ജില്ലയിലെ ഭൂ പ്രശ്നം; സമരത്തിന് വ്യാപാരികളുടെ പിന്തുണ

അടിമാലി: ഇടുക്കിയിലെ പട്ടയ ഭൂ വിഷയങ്ങളില്‍ അതിജീവന പോരാട്ടവേദിക്കൊപ്പം സമരം ശക്തമാക്കാനൊരുങ്ങി ഇടുക്കിയിലെ വ്യാപാരികളും. പിന്തുണ അറിയിച്ച് വ്യാപാരി വ്യവസായി ഏകോപന സമിതി സംസ്ഥാന നേതൃത്വം. പ്രതിഷേധത്തിനൊപ്പം നീതിക്കായി കോടതിയെ സമീപിക്കുമെന്ന്​ സംസ്ഥാന ട്രഷറര്‍ ദേവസ്യ മേച്ചേരി, ജില്ല പ്രസിഡന്റ്​ കെ.എൻ. ദിവാകരൻ എന്നിവർ അറിയിച്ചു. ജില്ലയിലെ ഭൂനിയമങ്ങള്‍ ഭേതഗതി ചെയ്ത് പട്ടയ ഭൂപ്രശ്നങ്ങള്‍ക്ക് പരിഹാരം കാണുമെന്ന സര്‍ക്കാര്‍ വാഗ്ദാനം പാലിക്കാത്തതിനെതി​രെ അതിജീവന പോരാട്ടവേദി സമരത്തിലേക്ക്​ നീങ്ങുന്ന സാഹചര്യത്തിലാണ് ജില്ലയിലെ വ്യാപാരി സമൂഹവും ഇവര്‍ക്ക് പിന്തുണ അറിയിച്ച് രംഗത്തെത്തിയത്. സംസ്ഥാനത്താകെ നടപ്പിലാക്കേണ്ട നിയമം ഇടുക്കിയില്‍ മാത്രം അടിച്ചേല്‍പിക്കുകയാണെന്നും വ്യാപാരി നേതൃത്വം വ്യക്തമാക്കി. ഇടുക്കിയിലെ ജനങ്ങളുടെ നീതിക്കായി കോടതിയെ സമീപിക്കുമെന്നും സംസ്ഥന ട്രഷറര്‍ ദേവസ്യ മേച്ചേരി പറഞ്ഞു. ഇടുക്കിയില്‍ നടക്കുന്ന സര്‍ക്കാറിന്‍റെ ഒന്നാം വാര്‍ഷിക ആഘോഷ പരിപാടിയിലേക്ക്​ നടക്കുന്ന പ്രതിഷേധ പരിപാടിയില്‍ പോരാട്ടവേദിക്കൊപ്പം വ്യാപാരികളും പങ്കെടുക്കും.