കല്ലുങ്കൽപടി പാലം പ്രളയത്തിൽ തകർന്നു; നാട്ടുകാർക്ക്​ ഇന്നും ദുരിതയാത്ര

അധികൃതർ അറിയാൻ​ ചെറുതോണി: 2018ലെ പ്രളയത്തിൽ തകർന്ന പാലം നാലുവർഷം പിന്നിട്ടിട്ടും പുനർനിർമിക്കാൻ നടപടിയില്ല. അധികൃതരുടെ അവഗണനയിൽ എൺപതോളം കുടുംബങ്ങളാണ്​ ദുരിതം അനുഭവിക്കുന്നത്​. കഞ്ഞിക്കുഴി പഞ്ചായത്തിലെ പെരിയാർവാലി കല്ലുങ്കൽപടി പാലം നാല്​, ആറ്​ വാർഡുകളെ ബന്ധിപ്പിക്കുന്നതാണ്​. 2018ലെ പ്രളയത്തിൽ പാലം തകർന്നടിയുകയായിരുന്നു. തുടർന്ന് നാട്ടുകാരുടെ ശ്രമഫലമായി താൽക്കാലിക സംവിധാനം ഒരുക്കിയാണ് ആളുകൾ സാഹസികമായി സഞ്ചരിച്ചിരുന്നത്​. പുതിയ പാലം നിർമിക്കണമെന്ന് നാളുകളായി ആവശ്യപ്പെടുന്നുണ്ടെങ്കിലും അധികൃതർ അനങ്ങാപ്പാറ നയമാണ് സ്വീകരിക്കുന്നത്. എൺപതോളം കുടുംബങ്ങളാണ് ഈ പാലത്തെ ആശ്രയിച്ച് ഇരുകരയിലുമായി കഴിയുന്നത്. നിരവധി സ്കൂൾ-കോളജ് വിദ്യാർഥികളും ഇതുവഴി ദിനംപ്രതി സഞ്ചരിക്കുന്നു. രോഗികളും കിടപ്പുരോഗികളുമായ നിരവധി പേർ ആശുപത്രി ഉൾപ്പെടെ ആവശ്യങ്ങൾക്ക് സാഹസികമായാണ് ഇതുവഴി പോകുന്നത്. ഈ പാലത്തിലൂടെ യാത്ര ബുദ്ധിമുട്ടാകുന്ന സാഹചര്യങ്ങളിൽ കിലോമീറ്റർ സഞ്ചരിച്ച് അട്ടിക്കളത്ത് എത്തി ബസിൽ കയറിയാണ് ചുരുളി, ആൽപ്പാറ സ്കൂളുകളിൽ വിദ്യാർഥികൾ എത്തുന്നത്. കാലവർഷത്തിനുമുമ്പ്​ പാലം പുനർനിർമിക്കാൻ അടിയന്തരമായി ജില്ല ഭരണകൂടം ഇടപെടണം എന്നാണ് നാട്ടുകാരുടെ ആവശ്യം. ചിത്രം: TDL kallumkalpadi palam പ്രളയത്തിൽ തകർന്ന കല്ലുങ്കൽപടി പാലം