പ്രതിഷ്ഠ മഹോത്സവം കൊടിയേറി

ചെറുതോണി: കഞ്ഞിക്കുഴി ശ്രീകൃഷ്ണസ്വാമി ക്ഷേത്രത്തിൽ പ്രതിഷ്ഠദിന മഹോത്സവത്തിന് തുടക്കമായി. മഹാഗണപതി ഹോമത്തോടെ ആരംഭിച്ച ചടങ്ങുകൾക്ക് തന്ത്രി മണ്ണാറശ്ശാല സുബ്രഹ്മണ്യൻ, ക്ഷേത്രം മേൽശാന്തി വിഷ്ണുനാഥ് തിരുവമ്പാടി തുടങ്ങിയവർ പ്രധാന കാർമികത്വം വഹിച്ചു. വെള്ളിയാഴ്ച രാവിലെ 7 30ന് ഉഷപൂജ, വിശേഷാൽ മഹാവിഷ്ണു പൂജ തുടങ്ങിയവ നടക്കും. ദീപാരാധനയോടെ 7.30ന്​ നടയടക്കും. പ്രതിഷ്ഠദിനമായ ഏഴിന് രാവിലെ 4.30ന് പള്ളിയുണർത്തൽ, തുടർന്ന് നടതുറക്കൽ, നിർമാല്യദർശനം, അഭിഷേകം, മലർനിവേദ്യം, ഗണപതി ഹോമം, ഉഷപൂജ, കലശപൂജ, കലശാഭിഷേകം, ഉച്ചപൂജ തുടങ്ങിയ ചടങ്ങുകൾ നടക്കും. 12ന് നടയടക്കലിനെത്തുടർന്ന് പ്രസാദ ഊട്ട് നടക്കും.