പരിക്കേറ്റനിലയിൽ കണ്ടെത്തിയയാൾ മരിച്ച സംഭവം: സ്ത്രീ അറസ്റ്റിൽ

തൊടുപുഴ: നഗരത്തിലെ ബസ്​ കാത്തിരിപ്പ്​ കേന്ദ്രത്തിൽ കാലിന് പരിക്കേറ്റ് രക്തംവാര്‍ന്ന നിലയില്‍ കണ്ടെത്തിയയാള്‍ മരിച്ച സംഭവത്തിൽ സ്ത്രീ അറസ്റ്റിൽ. പന്നിമറ്റം വെള്ളിയാമറ്റം തെക്കേതിൽ വീട്ടിൽ​ സെലീനയാണ്​ (50) അറസ്റ്റിലായത്​. ഉടുമ്പന്നൂര്‍ നടൂപ്പറമ്പില്‍ അബ്ദുസ്സലാമാണ്​ (അമ്പി-52) ചൊവ്വാഴ്ച കോട്ടയം മെഡിക്കല്‍ കോളജില്‍ മരിച്ചത്. പതിവായി തൊടുപുഴ ടൗണ്‍ഹാളിന്​ സമീപത്തെ വെയിറ്റിങ്​ ഷെഡില്‍ കിടന്നുറങ്ങിയിരുന്ന അബ്ദുസ്സലാമിനെ തിങ്കളാഴ്ച രാത്രി എട്ടോടെ പരിക്കേറ്റനിലയില്‍ കണ്ട നാട്ടുകാർ പൊലീസിനെ അറിയിക്കുകയായിരുന്നു. പൊലീസെത്തി ഓട്ടോയില്‍ ജില്ല ആശുപത്രിയിലേക്ക് മാറ്റി. എന്നാല്‍, നില ഗുരുതരമായതിനെ തുടര്‍ന്ന് മെഡിക്കല്‍ കോളജില്‍ എത്തിച്ചെങ്കിലും ചൊവ്വാഴ്ച രാവിലെ മരിച്ചു. നഗരത്തിൽ അലഞ്ഞുതിരിഞ്ഞുനടക്കുന്ന സെലീനയും അബ്​ദുസ്സാലാമും തമ്മിൽ വാക്കുതർക്കമുണ്ടായെന്ന വിവരത്തി‍ൻെറ അടിസ്ഥാനത്തിൽ സെലീനയെ ചൊവ്വാഴ്ചതന്നെ പൊലീസ്​ കസ്റ്റഡിയിലെടുത്തിരുന്നു. മദ്യം നൽകാത്തതി‍ൻെറ വൈരാഗ്യത്തിന്​ അബ്​ദുസ്സലാമി‍ൻെറ കാൽക്കുഴയിൽ സെലീന മൂർച്ചയേറിയ കത്തികൊണ്ട്​ മുറിവേൽപിക്കുകയായിരുന്നു. തുടർന്ന്​ രക്തം വാർന്നുപോയതാണ്​ മരണകാരണമായത്​. വിശദമായ ചോദ്യംചെയ്യലിൽ സെലീന കുറ്റം സമ്മതിച്ചതായി പൊലീസ്​ പറഞ്ഞു. മുറിവേൽപിക്കാൻ ഉപയോഗിച്ച കത്തി ഉപേക്ഷിച്ചനിലയിൽ പൊലീസ്​ കണ്ടെടുത്തു. പിടിച്ചുപറി, മോഷണം തുടങ്ങിയ കേസുകളിൽ പ്രതിയായിരുന്നു​ അബ്​ദുസ്സലാം. ചിത്രം: TDL Saleena അറസ്റ്റിലായ സെലീന