ആർപ്പാമറ്റം-കരിമണ്ണൂർ റോഡ് പുനർനിർമാണത്തിന്​ നടപടി

തൊടുപുഴ: ആർപ്പാമറ്റം-ചാലാശ്ശേരി-കരിമണ്ണൂർ റോഡ് ബി.എം ബി.സി നിലവാരത്തിൽ റീ ടാറിങ്​ നടത്താൻ നടപടിക്രമം പൂർത്തിയായതായി പി.ജെ. ജോസഫ് എം.എൽ.എ അറിയിച്ചു. തൊടുപുഴ നഗരസഭയിൽനിന്ന്​ ആരംഭിച്ച് കരിമണ്ണൂരിൽ എത്തുന്ന റോഡിന് എട്ട്​ കി.മീറ്ററാണ്​ ദൈർഘ്യം. 7.50 കോടിയാണ്​ നിർമാണ ചെലവ്​ കണക്കാക്കുന്നത്​. ടെൻഡർ പൂർത്തീകരിച്ചു. പി.ജെ. ജോസഫ് റവന്യൂ മന്ത്രിയായിരുന്ന കാലത്ത് വെള്ളപ്പൊക്ക ദുരിതാശ്വാസ പദ്ധതിയിൽനിന്ന് ഫണ്ടനുവദിച്ചാണ് റോഡ് ആദ്യം വീതികൂട്ടി നിർമിച്ചത്. റോഡ്​ നിർമാണത്തിന്​ ബജറ്റ്​ ഫണ്ടിൽനിന്ന്​ തുക അനുവദിപ്പിച്ച പി.ജെ. ജോസഫിനെ ജില്ല പഞ്ചായത്ത്​ അംഗം ​എം.ജെ. ജേക്കബ് അഭിനന്ദിച്ചു. ഗതാഗതക്കുരുക്ക്​ പരിഹരിക്കണം -പി.ഡി.പി തൊടുപുഴ: വെങ്ങല്ലൂർ ഷാപ്പുംപടി മുതൽ പ്രൈവറ്റ് ബസ് സ്റ്റാൻഡ് വരെ അനുഭവപ്പെടുന്ന രൂക്ഷ ഗതാഗതക്കുരുക്ക് പരിഹരിക്കാൻ മൂവാറ്റുപുഴ ഭാഗത്തുനിന്ന്​ വരുന്ന ബസുകൾ മങ്ങാട്ടുകവല ബൈപാസ് വഴി ന്യൂമാൻ കോളജ്-കാഞ്ഞിരമറ്റം ബൈപാസ്-മൂപ്പിൽകടവ് പാലം വഴി കെ.എസ്.ആർ.ടി.സി, പ്രൈവറ്റ് സ്റ്റാൻഡുകളിൽ എത്തുന്ന വിധം ക്രമീകരിക്കണമെന്ന്​ തൊടുപുഴ നിയോജക മണ്ഡലം കമ്മിറ്റി ആവശ്യപ്പെട്ടു. പ്രസിഡന്‍റ്​ ജലീൽ ഉടുമ്പന്നൂരിന്‍റെ അധ്യക്ഷതയിൽ ജില്ല പ്രസിഡന്‍റ്​ കെ. കബീർ ഉദ്ഘാടനം ചെയ്തു. യൂസുഫ്​ പെരുമ്പിള്ളിച്ചിറ, മുഹമ്മദ് മൗലവി അൽ കൗസരി, അഫ്സൽ ആലക്കോട്, കെ.എം. ഷിബിൻ, എം.കെ. പരീത്, മൈതീൻ കുഞ്ഞ്, അബ്ദുൽ റഹീം, റഷീദ്, റസാഖ്, സലീം യൂനുസ് എന്നിവർ സംസാരിച്ചു. ക്ഷീരകർഷക മാർച്ചും ധർണയും നാളെ തൊടുപുഴ: ക്ഷീര മേഖലയോടുള്ള അവഗണനക്കെതിരെയും വിവിധ ആവശ്യങ്ങൾ ഉന്നയിച്ചും കേരള സ്​​​റ്റേറ്റ്​ മിൽക്ക്​​ സൊസൈറ്റീസ്​ അസോസിയേഷൻ (കെ.എസ്​.എം.എസ്​.എ) നേതൃത്വത്തിൽ ജില്ല ക്ഷീരവികസന വകുപ്പ് ഡെപ്യൂട്ടി ഡയറക്ടറുടെ കാര്യാലയത്തിലേക്ക് മാർച്ചും ധർണയും നടത്തുമെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. പാൽ വില വർധിപ്പിക്കുക, കാലിത്തീറ്റവില കുറക്കുക, മിൽമയുടെ പാൽവില ചാർട്ട് പരിഷ്കരിക്കുക, ത്രിതല പഞ്ചായത്ത് സബ്സിഡി 40,000 രൂപയിൽനിന്ന്​ ഒരു ലക്ഷം ആക്കി വർധിപ്പിക്കുക, എല്ലാ ബ്ലോക്ക് പഞ്ചായത്തിലും 24 മണിക്കൂറും പ്രവർത്തിക്കുന്ന മൊബൈൽ വെറ്ററിനറി ആശുപത്രി ആരംഭിക്കുക, കാലിത്തീറ്റക്ക് 50 ശതമാനം സബ്സിഡി ഏർപ്പെടുത്തുക, ക്ഷീരസംഘങ്ങളെ ആദായനികുതിയിൽനിന്ന്​ ഒഴിവാക്കുക, ക്ഷീരകർഷകരെ തൊഴിലുറപ്പു പദ്ധതിയിൽപെടുത്തുക തുടങ്ങിയ ആവശ്യങ്ങളാണ്​ ഉന്നയിക്കുന്നത്​.​ 29ന്​ രാവിലെ 10ന്​ തൊടുപുഴ പ്രൈവറ്റ് ബസ്​ സ്റ്റാൻഡ് പരിസരത്തുനിന്ന്​ മാർച്ച്​ ആരംഭിക്കും. വാർത്തസമ്മേളനത്തിൽ കെ.എസ്​.എം.എസ്​.എ ജില്ല പ്രസിഡന്‍റ്​ പി.ആർ. സലിംകുമാർ, ജനറൽ സെക്രട്ടറി എം.ആർ. അനിൽകുമാർ, വൈസ്​ പ്രസിഡന്‍റുമാരായ സണ്ണി തെങ്ങുംപള്ളിൽ, എ.ജെ. മാനുവൽ, തൊടുപുഴ താലൂക്ക് പ്രസിഡന്‍റ്​ എം.ടി. ജോണി എന്നിവർ പങ്കെടുത്തു.