വണ്ണപ്പുറം വില്ലേജ് ഓഫിസ് പ്രവർത്തനം അവതാളത്തിൽ -കോൺഗ്രസ്

വണ്ണപ്പുറം: പൂർണ ചുമതലയുള്ള വില്ലേജ് ഓഫിസറെ വണ്ണപ്പുറത്ത്​ ഉടൻ നിയമിച്ചില്ലെങ്കിൽ പ്രക്ഷോഭം ആരംഭിക്കുമെന്ന് കോൺഗ്രസ് വണ്ണപ്പുറം മണ്ഡലം കമ്മിറ്റി അറിയിച്ചു. വില്ലേജ്​ ഓഫിസർ ഇല്ലാത്തതിനാൽ ജനങ്ങൾ ബുദ്ധിമുട്ടിലാണ്. ലൈഫ് പദ്ധതിയിലെ ഗുണഭോക്താക്കൾക്ക് സ്ഥലം പോക്കുവരവ് ചെയ്യാനാവാത്ത സാഹചര്യമാണ്. വിദ്യാഭ്യാസ ആവശ്യങ്ങൾക്കുള്ള സർട്ടിഫിക്കറ്റുകളും വില്ലേജ് ഓഫിസർ ഇല്ല എന്ന കാരണത്താൽ നിരസിക്കുകയാണ്. പഴയ വില്ലേജ് ഓഫിസറെ സ്ഥലം മാറ്റിയതിനെത്തുടർന്ന്​ പുതുതായി ചാർജ് എടുത്തയാൾ ദീർഘ അവധിയെടുത്ത് പോയതാണ് ഓഫിസ് പ്രവർത്തനം അവതാളത്തിലാകാൻ കാരണം. പട്ടയക്കുടി പുളിക്കത്തൊട്ടി തുടങ്ങിയ പ്രദേശങ്ങളിൽനിന്ന്​ ദിവസേന ഓരോ ആവശ്യങ്ങൾക്കെത്തുന്നവർ വില്ലേജ് ഓഫിസർ ഇല്ലാത്തതിനാൽ മടങ്ങുകയാണെന്നും മണ്ഡലം കമ്മിറ്റി ചൂണ്ടിക്കാട്ടി. മണ്ഡലം പ്രസിഡന്‍റ്​ സജി കണ്ണമ്പുഴ അധ്യക്ഷത വഹിച്ചു. കെ.ജി. ശിവൻ, അഡ്വ. ആൽബർട്ട് ജോസ്, അനീഷ് കിഴക്കേൽ, കെ.എം. സുരേഷ്, അബ്ബാസ് മീരാൻ തുടങ്ങിയവർ സംസാരിച്ചു.