പലവരവിലും നടക്കാതെ പോക്കുവരവ്; മന്നാങ്കണ്ടം വില്ലേജിനെതിരെ ഭൂ ഉടമകൾ

അടിമാലി: പോക്കുവരവ് നടത്തുന്നതിന് വില്ലേജിലെത്തുന്ന ഭൂ ഉടമകളെ വില്ലേജ് അധികൃതര്‍ വലക്കുന്നതായി പരാതി. മന്നാങ്കണ്ടം വില്ലേജിനെതിരെയാണ് വ്യാപകമായി പരാതി ഉയര്‍ന്നിരിക്കുന്നത്. പട്ടയഭൂമി ക്രയവിക്രങ്ങള്‍ക്ക്​ ശേഷമാണ് ഭൂ ഉടമകള്‍ പോക്കുവരവിനായി വില്ലേജ് ഓഫിസില്‍ എത്തുന്നത്. ഈ സമയം റീ സര്‍വേ അപാകതകള്‍, തണ്ടപ്പേരുകളില്‍ വ്യത്യാസം തുടങ്ങി നിരവധിയായ കാരണങ്ങള്‍ ചൂണ്ടിക്കാട്ടി പോക്കുവരവ് ചെയ്ത് നല്‍കുന്നില്ലെന്നാണ്​ ആക്ഷേപം. ഒരുവര്‍ഷമായി ഓഫിസ് കയറിയിറങ്ങി കാത്തിരിക്കുന്നവര്‍ നിരവധിയാണ്. എന്നാല്‍, ചില ഏജന്‍റുമാർ മുഖാന്തരം അപേക്ഷ നല്‍കിയാല്‍ ദിവസങ്ങള്‍ക്കകം പോക്കുവരവ് നടത്തി കരംഅടക്കാന്‍ സാധിക്കുന്നതായും പറയുന്നു. ഇതിന് പുറമെ പുതിയ പട്ടയ അപേക്ഷകളിലും വില്ലേജില്‍ പക്ഷപാതപരമായ നടപടി സ്വീകരിക്കുകയാണെന്ന്​ ആക്ഷേപമുണ്ട്​. കഴിഞ്ഞ റീ സര്‍വേയില്‍ കൂടുതല്‍ പേര്‍ക്കും പട്ടയഭൂമിയില്‍ വലിയ കുറവാണ് രേഖപ്പെടുത്തിയിരിക്കുന്നത്. കൂടാതെ തണ്ടപ്പേര്‍, സർവേ നമ്പറുകളും മാറ്റി രേഖപ്പെടുത്തിയിരിക്കുന്നു. ഇതുവഴി പട്ടയ വസ്തു ഉടമകള്‍ കൂടുതല്‍ ദുരിതത്തിലായിരിക്കുകയാണെന്നും ജില്ല കലക്ടർ അടിയന്തരമായി പ്രശ്‌നത്തില്‍ ഇടപെട്ട് പരിഹാരം ഉണ്ടാക്കണമെന്നുമാണ് ആവശ്യം.