മാങ്കുളത്ത്​ മാനം കറുത്താൽ വൈദ്യുതി മുടങ്ങും

അടിമാലി: മാനത്ത്​ മഴക്കാറ്​ കണ്ടാൽ മതി വൈദ്യുതി മുടങ്ങുന്ന അവസ്ഥയാണ്​ ഇപ്പോൾ മാങ്കുളത്ത്​. വേനല്‍മഴ പൊടിഞ്ഞുതുടങ്ങിയത്​ മുതൽ ഇതാണ്​ അവസ്ഥ. മഴചാറുമ്പോള്‍ തുടങ്ങുന്ന വൈദ്യുതിയുടെ ഒളിച്ചുകളി മഴ കനക്കുന്നതോടെ തീര്‍ത്തും നിൽക്കും. പിന്നെ മഴതോര്‍ന്ന്​ മണിക്കൂറുകള്‍ക്ക്​ ശേഷമാണ്​ വൈദ്യുതി ബന്ധം പുനഃസ്ഥാപിക്കപ്പെടുന്നത്. ചിത്തിരപുരം ഇലട്രിക്കല്‍ മേജര്‍ സെക്​ഷന്‍റെ കീഴിലാണ് മാങ്കുളം. സബ് എന്‍ജിനീയറുടെ നേതൃത്വത്തില്‍ ഒരു ഓഫിസ് മാങ്കുളത്തുണ്ടെങ്കിലും ജീവനക്കാരുടെ കുറവ് പ്രവര്‍ത്തനത്തെ സാരമായി ബാധിക്കുന്നുണ്ട്​. കുരുശുപാറയില്‍നിന്ന്​ വിരിപാറവരെ ഏലക്കാട്ടിലൂടെയാണ് മാങ്കുളത്തേക്ക് വൈദ്യുതി എത്തിക്കുന്നത്. ഇവിടെ മരങ്ങള്‍ വീണ് വൈദ്യുതി മുടങ്ങുന്നതും മരച്ചില്ലകള്‍ ലൈനില്‍വീണ് ലൈന്‍ തകരാറാവുന്നതും പതിവാണ്. ഈ സാഹചര്യമാണ് വൈദ്യുതി മുടക്കത്തിന് പ്രധാന കാരണം. വൈദ്യുതി മടക്കത്തിന്‍റെ കാര്യമറിയാന്‍ വൈദ്യുതി ഓഫിസിലേക്ക്​ വിളിച്ചാല്‍ ഫോണും നിശ്ചലമാണെന്ന്​ നാട്ടുകാര്‍ പറയുന്നു. അടിക്കടി വൈദ്യുതി വിതരണം നിലക്കുന്നതുമൂലം വ്യാപാരശാലകള്‍ പ്രത്യേകിച്ച്​ മെഡിക്കല്‍ സ്‌റ്റോര്‍, ബേക്കറികള്‍, ഇറച്ചി-മീന്‍ വില്‍പനശാലകള്‍, ഫോട്ടോസ്റ്റാറ്റ്-ഡി.ടി.പി സെന്‍ററുകൾ, അക്ഷയകേന്ദ്രങ്ങള്‍ എന്നിവയുടെ പ്രവര്‍ത്തനവും പ്രതിസന്ധിയിലാണ്. ഗൃഹോപകരണങ്ങള്‍ പ്രവര്‍ത്തിപ്പിക്കാന്‍ കഴിയാത്തതുമൂലം വീട്ടമ്മമാരും വിഷമത്തിലാണ്. ഈ സാഹചര്യത്തില്‍ മാങ്കുളത്ത് സബ്‌സ്റ്റേഷന്‍ സ്ഥാപിക്കുകയും ചിത്തിരപുരത്തുനിന്ന് മണ്ണിനടിയിലൂടെ വൈദ്യുതി എത്തിക്കുകയും ചെയ്യണമെന്ന് നാട്ടുകാര്‍ ആവശ്യപ്പെട്ടു.