ആശ്വാസമേകാൻ ആയിരം കരങ്ങൾ

തൊടുപുഴ: ജീവകാരുണ്യപ്രവർത്തനങ്ങൾ ഏറ്റവും സജീവമാകുന്ന മാസംകൂടിയാണ്​ റമദാൻ കാലം. വ്യക്തികൾ, രാഷ്​​ട്രീയ-സാമൂഹിക-സന്നദ്ധ-പ്രവാസി സംഘടനകൾ, മഹല്ല്​ കമ്മിറ്റികൾ എന്നിവയുടെ നേതൃത്വത്തിൽ നാടിന്‍റെ വിവിധ ഭാഗങ്ങളിൽ ഇത്തവണയും റമദാൻ റിലീഫ്​ പ്രവർത്തനങ്ങൾ ഊർജിതമാണ്​. കഴിഞ്ഞ രണ്ട്​ വർഷം കോവിഡ്​ പ്രതിസന്ധിയിലൂടെ നാട്​ കടന്നുപോയ റമദാൻ കാലത്ത്​ റിലീഫ്​ പ്രവർത്തനങ്ങളും കോവിഡ്​ ദുരിതബാധിതരെ കേന്ദ്രീകരിച്ചായിരുന്നു. ഇത്തവണ കൂടുതൽ വിപുല ​രീതിയിലാണ്​ റിലീഫ്​ പ്രവർത്തനങ്ങൾ. കോവിഡ്​കാലത്ത്​ രോഗബാധിതരുള്ള വീടുകളിൽ അവശ്യവസ്തുക്കളും ഭക്ഷണവും മരുന്നും എത്തിക്കുന്നതടക്കം കാര്യങ്ങൾ റിലീഫ്​ പ്രവർത്തനങ്ങളുടെ ഭാഗമായി നടന്നു. തൊഴിൽ നഷ്ടപ്പെട്ട്​ വരുമാനം നിലച്ച കുടുംബങ്ങൾക്ക്​ ഇത്തരം കൂട്ടായ്മകളുടെ സഹായഹസ്തങ്ങൾ ആശ്വാസമായി. അർഹരായവരെ കണ്ടെത്താനും സഹായമെത്തിക്കാനും സംഘടനകൾക്ക്​ കീഴിൽ പ്രത്യേക ടീമിനുതന്നെ രൂപം നൽകിയിട്ടുണ്ട്​. നിത്യോപയോഗ സാധനങ്ങളടങ്ങിയ കിറ്റുകളുടെ വിതരണമാണ്​ ഇപ്പോൾ റമദാൻ റിലീഫിന്‍റെ ഭാഗമായി പലയിടങ്ങളിലും നടക്കുന്നത്​. പച്ചക്കറികളും പലവ്യഞ്ജനങ്ങളും നോമ്പുതുറ വിഭവങ്ങളുമെല്ലാം ഇതിൽ ഉൾപ്പെടുന്നു. നിർധന കുടുംബങ്ങൾക്ക്​ പുതുവസ്​ത്ര വിതരണം, രോഗികൾക്ക്​ മരുന്ന്​ വിതരണം, വരുമാനം മുടങ്ങിയവർക്ക്​ ധനസഹായം, രോഗികളുള്ള കുടുംബങ്ങൾക്ക്​ ചികിത്സ സഹായം എന്നിവയെല്ലാം റമദാൻ റിലീഫിന്‍റെ ​ഭാഗമാണ്​. ചിലയിടങ്ങളിൽ വീട് നിർമാണം, വീട്​ അറ്റകുറ്റപ്പണി, ഭൂമി വാങ്ങിനൽകൽ തുടങ്ങിയ വൻതോതിലെ ​പ്രവർത്തനങ്ങളും റിലീഫ്​ കമ്മിറ്റികൾ ഏറ്റെടുത്ത്​ ചെയ്യുന്നുണ്ട്​. ഓരോ വർഷവും റമദാൻ റിലീഫിന്‍റെ ഭാഗമായി വിവിധ മഹല്ലുകളിലായി ലക്ഷക്കണക്കിന്​ രൂപ ചെലവഴിക്കുന്നുണ്ട്​. പ്രവാസികൾ നാട്ടിലെ റമദാൻ റിലീഫ്​ പ്രവർത്തനങ്ങൾക്ക്​ മികച്ച പിന്തുണ നൽകിവരുന്നു. ഇതുവഴി ആയിരക്കണക്കിന്​ കുടുംബങ്ങളിലാണ്​ ഓ​രോ റമദാൻ കാലത്തും ആശ്വാസമെത്തിക്കാൻ കഴിയുന്നത്​. റോഡിൽ നിർമാണസാമഗ്രികൾ; അപകടം പതിവ്​ കട്ടപ്പന: കരാറുകാരൻ റോഡ് കൈയേറി നിർമാണ സാമഗ്രികൾ ഇറക്കിയതിനെത്തുടർന്ന്​ കട്ടപ്പന സ്കൂൾകവല-മൈത്രിനഗർ റോഡിൽ അപകടം പതിവാകുന്നു. റോഡ് കൈയേറി പാറപ്പൊടിയും മെറ്റലും കൂട്ടിയിട്ടിരിക്കുന്നതാണ് അപകടത്തിനിടയാക്കുന്നത്. കഴിഞ്ഞ നാലുദിവസത്തിനിടെ മൂന്ന് ബൈക്ക് യാത്രികരാണ് ഇവിടെ മെറ്റലിൽ തെന്നിവീണത്. കട്ടപ്പന-കോട്ടയം പാതയിൽ സ്കൂൾ കവലയിൽനിന്ന്​ മൈത്രി നഗറിലേക്ക്​ പോകുന്ന പാതയിൽ നിർമിച്ച പാലത്തിലാണ് പകുതിയിലധികം ഭാഗവും കൈയേറി കരാറുകാരൻ പാറപ്പൊടിയും മെറ്റലും കൂട്ടിയിട്ടിരിക്കുന്നത്. മാസങ്ങൾക്ക് മുമ്പ്​ നിർമാണം പൂർത്തിയാക്കിയ പള്ളിക്കവല-സ്കൂൾ കവല റോഡിന്‍റെ ഐറിഷ് ഓട നിർമിക്കുന്നതിനാണ് സാമഗ്രികൾ 10 ദിവസം മുമ്പ്​ വലിയ ലോറിയിൽ കൊണ്ടുവന്നിറക്കിയത്. എതിർദിശയിൽനിന്ന്​ ഒരു വാഹനമെത്തിയാൽ പാലത്തിൽ ഗതാഗത തടസ്സമുണ്ടാകും. കഴിഞ്ഞ ദിവസം ഇതുവഴിയെത്തിയ ബൈക്ക് യാത്രികൻ പാലത്തിൽ നിരന്ന് കിടക്കുന്ന മെറ്റലിൽ കയറി മറിഞ്ഞുവീണിരുന്നു. ഗതാഗതത്തിന്​ തടസ്സം സൃഷ്ടിക്കുന്ന വിധം കൂട്ടിയിട്ട നിർമാണ സാമഗ്രികൾ ഉടനടി നീക്കണമെന്നാണ് നാട്ടുകാരുടെ ആവശ്യം.