ഈ ആനകൾ തോട്ടം മേഖലയുടെ പേടിസ്വപ്​നം

ആറ്​ കാട്ടാനകളാണ്​ ആളുകളുടെ ഉറക്കംകെടുത്തുന്നത്​ അടിമാലി: പടയപ്പ, ചില്ലിക്കൊമ്പന്‍, അരിക്കൊമ്പന്‍, ഗണേശന്‍, ഊശികൊമ്പന്‍ , മുറിവാലന്‍....നാളുകളായി തോട്ടം മേഖലയുടെ ഉറക്കംകൊടുത്തുന്നത്​ ഈ ആറ്​ കാട്ടാനകളാണ്​. രാത്രിയും പകലുമില്ലാതെ തലങ്ങും വിലങ്ങും കൊമ്പന്മാര്‍ സ്വൈരവിഹാരം നടത്തുമ്പോള്‍ ഇനിയെന്ത് എന്ന ചോദ്യത്തിന് മാത്രം ഉത്തരമില്ല. ശാന്തന്‍പാറ, ചിന്നക്കനാല്‍, മൂന്നാര്‍, ദേവികുളം പഞ്ചായത്തുകളിലാണ്​ ഇവ ജനങ്ങളുടെ ജീവനും സ്വത്തിനും ഭീഷണിയായി വിഹരിക്കുന്നത്. കഴിഞ്ഞദിവസം കെ.എസ്.ആര്‍.ടി.സി ബസിന്​ നേരെ ആക്രമണം നടത്തിയ പടയപ്പ തൊട്ടടുത്ത ദിവസം പച്ചക്കറി കട തകര്‍ത്ത് പഴവര്‍ഗങ്ങള്‍ ഉള്‍പ്പെടെ അകത്താക്കിയാണ് മടങ്ങിയത്. ഇതിന്​ പുറമെ കണ്ണില്‍ കണ്ടതെല്ലാം നശിപ്പിച്ചും ജനങ്ങള്‍ക്കുനേരെ പാഞ്ഞടുത്തും ഭീകരാന്തരീക്ഷം സൃഷ്ടിച്ചു. മുമ്പൊക്കെ രാത്രിയിലായിരുന്നു ശല്യമെങ്കില്‍ ഇപ്പോള്‍ പകലും ജനങ്ങള്‍ക്ക് രക്ഷയില്ല. ഏതുനേരത്ത് എവിടെ പ്രത്യക്ഷപ്പെടുമെന്ന് പറയാനാവാത്ത അവസ്ഥയാണ്​. രാവിലെ ജോലിക്കിറങ്ങുന്നവര്‍ ജീവന്‍ കൈയില്‍പ്പിടിച്ചാണ് യാത്രചെയ്യുന്നത്. പലതവണ ആനയുടെ മുന്നില്‍പ്പെട്ട്​ തലനാരിഴക്ക്​ രക്ഷപ്പെട്ടവര്‍ ഏറെയാണ്. കാട്ടാനശല്യത്തിന് ശാശ്വതപരിഹാരം ആവശ്യപ്പെട്ട് പ്രദേശവാസികള്‍ ഒട്ടേറെ സമരം നടത്തിയെങ്കിലും സ്ഥിഗതികളിൽ മാറ്റമില്ല. ചിന്നക്കനാലില്‍ അടുത്തിടെ കാട്ടാന യുവാവിനെ കൊലപ്പെടുത്തിയിരുന്നു. നാട്ടുകാർ യുവാവിന്‍റെ മൃതദേഹവുമായാണ്​ വനംവകുപ്പിനെതിരെ സമരം നടത്തിയത്​. എന്നാല്‍, പതിവ് നടപടിക്രമങ്ങള്‍ക്കപ്പുറം വനംവകുപ്പിന്‍റെ ഭാഗത്തുനിന്ന്​ കൂടുതൽ നടപടി ഒന്നും ഉണ്ടായില്ലെന്ന്​ പറയുന്നു. പ്രശ്‌നക്കാരായ ആറ്​ കൊമ്പന്മാരെ പിടികൂടി കോടനാട് ആന സംരക്ഷണ കേന്ദ്രത്തിലേക്ക് മാറ്റണമെന്നാണ് നാട്ടുകാരുടെ ആവശ്യം. ഒറ്റക്ക് സഞ്ചരിക്കാന്‍ ഇഷ്ടപ്പെടുന്ന ഈ കാട്ടാനകളാണ് മേഖലയിലെ അപകടകാരികള്‍. ജനവാസ മേഖലയില്‍നിന്ന്​ പോകാന്‍ മടിക്കുന്ന ഇവ വിനോദ സഞ്ചാരമേഖലക്കും ഭീഷണിയാണ്. idg adi 1 ana storry ചിത്രം - പടയപ്പ. പന്തൽ കാൽനാട്ടി തൊടുപുഴ: പ്രമുഖ തീർഥാടന കേന്ദ്രമായ മുതലക്കോടം സെന്‍റ്​ ജോർജ്​ ഫെറോന പള്ളിയില്‍ തിരുനാളിനോട്​ അനുബന്ധിച്ച പന്തല്‍ കാല്‍നാട്ട്​ വികാരി ഫാ. ഡോ. ജോർജ്​ താനത്തുപറമ്പില്‍ നിർവഹിച്ചു. സഹവികാരിമാരായ ഫാ. അബ്രഹാം പാറക്കല്‍, ഫാ. ജസ്റ്റിന്‍ ചേറ്റൂര്‍, ഫാ. ഡോ. തോമസ് പെരിയപ്പുറം, തിരുനാള്‍ കണ്‍വീനര്‍മാരായ ടൈറ്റസ് അറക്കല്‍, ജോയി പഴുക്കാകുളത്ത്, ജസ്റ്റിന്‍ പനച്ചിക്കാട്ട്, ജോയി കല്ലിങ്കക്കുടിയില്‍, കൈക്കാരന്മാരായ ടി.എ​. ജോർജ്​ തുറക്കല്‍തെക്കേക്കര, ജോർജ്​ ജോണ്‍ കൊച്ചുപറമ്പില്‍, ജോയി കരോട്ടുമലയില്‍, സാന്‍റോ പോള്‍ ചെമ്പരത്തി എന്നിവർ സംബന്ധിച്ചു.