ബൈപാസ് റോഡില്‍ വണ്‍വേ സംവിധാനം കാര്യക്ഷമമാക്കണം

- അധികൃതർ അറിയാൻ- നെടുങ്കണ്ടം: പഞ്ചായത്ത് ഓഫിസ് ബൈപാസ് റോഡില്‍ ഗതാഗത തടസ്സവും പോര്‍വിളിയും പതിവാകുന്നു. നെടുങ്കണ്ടം കിഴക്കേകവലയില്‍ പഞ്ചായത്ത് ഓഫിസിന് അരികിലൂടെയുള്ള ബൈപാസ് റോഡിലാണിത്. ഇവിടെ വണ്‍വേ സംവിധാനമാണ് ഏര്‍പ്പെടുത്തിയിരിക്കുന്നതെങ്കിലും വാഹനങ്ങള്‍ ഇരുവശങ്ങളിലേക്കും യാത്രചെയ്യുന്നുണ്ട്. കുമളി മൂന്നാര്‍ സംസ്ഥാന പാതയില്‍നിന്ന്​ സ്‌റ്റേഡിയം റോഡിലേക്കുള്ളതാണ് ബൈപാസ്. സ്‌റ്റേഡിയം റോഡിലേക്ക് വാഹനങ്ങള്‍ പ്രവേശിക്കാന്‍ മാത്രമാണ് അനുമതിയുള്ളത്. സംസ്ഥാന പാതയിലേക്ക്​ വാഹനങ്ങള്‍ ഇതുവഴി പ്രവേശിക്കാന്‍ പാടില്ലെന്ന കര്‍ശന നിര്‍ദേശമുണ്ട്. എന്നാല്‍, വാഹനങ്ങള്‍ അലക്ഷ്യമായി തലങ്ങും വിലങ്ങും പായുകയാണ്​. നൂറുകണക്കിന് ആളുകള്‍ ആശ്രയിക്കുന്ന റോഡില്‍ പലപ്പോഴും ഗതാഗത തടസ്സം രൂക്ഷമാണ്​. പഞ്ചായത്ത് ഓഫിസ്, അക്ഷയ സെന്‍റര്‍, ലൈബ്രറി, താലൂക്ക് ആശുപത്രി, എന്‍.സി.സി ഓഫിസ്, കെ.എസ്.ആര്‍.ടി.സി ഡിപ്പോ, പഞ്ചായത്ത് സ്റ്റേഡിയം, വൈദ്യുതി ബോര്‍ഡ് ഓഫിസ് എന്നിവിടങ്ങളിലേക്കെല്ലാം എത്താനുള്ള എളുപ്പമാര്‍ഗമാണ് ബൈപാസ്. പഞ്ചായത്ത് അധികൃതരും പൊലീസും ആവശ്യമായ നടപടി കൈക്കൊള്ളണമെന്ന ആവശ്യം ശക്തമാണ്.