അവധിക്കാലത്ത്​ കുഞ്ഞുങ്ങൾക്ക്​ സ്​നേഹക്കൂടൊരുക്കാം

'സനാഥന ബാല്യം' പദ്ധതിയുമായി വനിത ശിശു വികസന വകുപ്പ്​ തൊടുപുഴ: ആരോരുമില്ലാത്ത കുട്ടികളെക്കൂടി അവധിക്കാലത്ത് വീട്ടില്‍ സംരക്ഷിക്കാന്‍ അവസരം ഒരുങ്ങുന്നു. വനിത ശിശു വികസന വകുപ്പിനുകീഴിലുള്ള ശിശു സംരക്ഷണ കേന്ദ്രങ്ങളിൽ കഴിയുന്ന കുട്ടികളിൽ മധ്യവേനലവധിയിൽ​ സ്വഭവനങ്ങളിൽ പോകാൻ കഴിയാത്തവർക്ക്​ നല്ലൊരു കുടുംബാനുഭവം നൽകുന്നതിനായാണ്​ 'സനാഥന ബാല്യം' എന്ന പേരിൽ പദ്ധതി നടപ്പാക്കുന്നത്​. ജില്ലയിലെ 54 ശിശുസംരക്ഷണ സ്ഥാപനങ്ങളിൽനിന്നുള്ള ആറുമുതൽ 18 വയസ്സുവരെയുള്ള കുട്ടികളെ മധ്യവേനൽ അവധിക്കാലത്ത്​ സ്വന്തം മക്കൾക്കൊപ്പം താമസിപ്പിച്ച്​ നല്ലൊരു കുടുംബാനുഭവം ലഭ്യമാക്കുകയാണ്​ പദ്ധതിയുടെ ലക്ഷ്യം. 35 വയസ്സ്​​ പൂർത്തിയായ ദമ്പതികൾക്ക്​ പദ്ധതിയിലേക്ക്​ അപേക്ഷിക്കാം. ഒന്നിലധികം കുട്ടികളെ സംരക്ഷിക്കാൻ പ്രാപ്തരായ രക്ഷിതാക്കൾക്ക്​ മുൻഗണനയുണ്ട്​. കാലാവധി അവസാനിക്കു​​മ്പോൾ കുട്ടികളെ ശിശുസംരക്ഷണ കേന്ദ്രങ്ങളിൽ തിരികെ എത്തിക്കണം. വനിത ശിശു വികസന വകുപ്പിനുകീഴിൽ പ്രവർത്തിക്കുന്ന ജില്ല ശിശു സംരക്ഷണ യൂനിറ്റ്​, ചൈൽഡ്​ വെൽഫെയർ കമ്മിറ്റി എന്നിവ മുഖേനയാണ്​​ പദ്ധതി നടപ്പാക്കുന്നത്​. അപേക്ഷ സ്വീകരിക്കുന്ന അവസാന തീയതി ഏപ്രിൽ 10​ ആയിരിക്കും. അപേക്ഷ ഫോറത്തിനും കൂടുതൽ വിവരങ്ങൾക്കും തൊടുപുഴ വെങ്ങല്ലൂരിൽ പ്രവർത്തിക്കുന്ന ഇടുക്കി ജില്ല ശിശു സംരക്ഷണ യൂനിറ്റിൽ നേരിട്ടോ ഫോൺ മുഖേനയോ ബന്ധപ്പെടാം. ഫോൺ: 04862-200108, 7025174038, 9744167198. 2016ലാണ്​ വെക്കേഷന്‍ ഫോസ്റ്റര്‍ കെയര്‍ എന്ന പേരിൽ പദ്ധതി തുടങ്ങിയത്​. യോഗ്യരാകുന്ന കുടുംബാംഗങ്ങള്‍ക്ക് കൗണ്‍സലിങ്ങും കുട്ടികളുമായി കൂടിക്കാഴ്ചക്ക്​ അവസരവും ഒരുക്കും. ആദ്യവർഷങ്ങളിൽ കുട്ടികളെ സ്വീകരിക്കുന്നവരുടെ എണ്ണം കുറവായിരുന്നെങ്കിലും ഇപ്പോൾ അപേക്ഷകരുടെ എണ്ണം കൂടിവരുന്നുണ്ടെന്ന്​ അധികൃതർ പറയുന്നു​. അപേക്ഷ പരിശോധിച്ച്​ അവരുടെ കുടുംബങ്ങളിലെ സ്ഥിതിഗതികൾ മനസ്സിലാക്കി കുട്ടികളെ ഇവർ സംരക്ഷിക്കുന്നത്​ അടക്കമുള്ള കാര്യങ്ങൾ ചൈൽഡ്​ പ്രൊട്ടക്ഷൻ ഓഫിസർമാരുടെ സഹായത്തിൽ ഉറപ്പുവരുത്തിയാകും നടപടികൾ. യൂത്ത് ലീഗ് സിവിൽ സ്‌റ്റേഷൻ മാർച്ച് നാളെ തൊടുപുഴ: കെ-റെയിൽ പദ്ധതി അടിച്ചേൽപിക്കുന്ന സംസ്ഥാന സർക്കാറിന്‍റെ നിലപാടിൽ പ്രതിഷേധിച്ച് ശനിയാഴ്ച രാവിലെ 10ന്​ തൊടുപുഴ സിവിൽ സ്‌റ്റേഷനിലേക്ക് മുസ്​ലിം യൂത്ത് ലീഗ് ജില്ല കമ്മിറ്റിയുടെ നേതൃത്വത്തിൽ മാർച്ച് സംഘടിപ്പിക്കും. കെ-റെയിൽ പദ്ധതിയുടെ ഇരകൾക്ക് തൊഴിൽ ലഭ്യത, പദ്ധതിയിൽനിന്നുള്ള വരുമാനം എന്നീ കാര്യങ്ങളിൽ സർക്കാർ ജനങ്ങളെ തെറ്റിദ്ധരിപ്പിക്കുകയാണെന്നും സർവേക്കല്ല് സ്ഥാപിക്കുന്നതിലൂടെ കോടികളുടെ അഴിമതിക്ക് സർക്കാർ ശ്രമിക്കുകയാണെന്നും നിലവിലെ റെയിൽ സംവിധാനം താളം തെറ്റിക്കുന്ന സിൽവർ ലൈൻ പദ്ധതിയിൽ നിന്ന്​ പിന്മാറണമെന്നും ആവശ്യപ്പെട്ടാണ് മാർച്ച് സംഘടിപ്പിക്കുന്നതെന്ന് ജില്ല പ്രസിഡന്‍റ്​ പി.എച്ച്. സുധീർ, ജനറൽ സെക്രട്ടറി നിസാർ പഴേരി, ട്രഷറർ കെ.എസ്. കലാം എന്നിവർ പറഞ്ഞു.