വെടിയൊച്ചയിൽ നടുങ്ങി മൂലമറ്റം

തൊടുപുഴ: തട്ടുകടയിലെ വാക്​തര്‍ക്കത്തെ തുടര്‍ന്നുണ്ടായ വെടിവെപ്പിൽ ഒരാള്‍ കൊല്ലപ്പെട്ട സംഭവത്തില്‍ ഞെട്ടിത്തരിച്ച് നാട്. മൂലമറ്റം -പാലാ റൂട്ടില്‍ സര്‍വിസ് നടത്തുന്ന സ്വകാര്യബസിലെ ജീവനക്കാരൻ സനലിന്‍റെ (32) മരണമാണ് നാടിനെ നടുക്കിയത്​. ശനിയാഴ്ച രാത്രി 10.50 ഓടെ അറക്കുളം അശോക കവലയില്‍ പ്രവര്‍ത്തിക്കുന്ന തട്ടുകടയില്‍ ഭക്ഷണത്തെ ചൊല്ലിയുണ്ടായ വാക്​തര്‍ക്കത്തെ തുടര്‍ന്നാണ്​ സനല്‍ വെടിയേറ്റ്​ മരിച്ചത്. അറക്കുളത്തിന്‍റെ ചരിത്രത്തില്‍ ആദ്യമായാണ് ഇങ്ങനൊരു വെടിയൊച്ച മുഴങ്ങുന്നതെന്ന്​ നാട്ടുകാർ പറയുന്നു​. രാത്രി സംഭവം നടന്നതറിഞ്ഞ്​ ഒട്ടേറെ പേരാണ്​ സ്ഥലത്ത്​ തടിച്ചുകൂടിയത്​. കഴുത്തിന് വെടിയേറ്റ സനല്‍ സംഭവസ്ഥലത്തുതന്നെ മരണപ്പെടുകയായിരുന്നു. സംഭവമറിഞ്ഞ് ജില്ല പൊലീസ് മേധാവി ആര്‍. കറുപ്പുസാമി, തൊടുപുഴ ഡിവൈ.എസ്.പി. എ.ജി. ലാല്‍ എന്നിവരുടെ നേതൃത്വത്തില്‍ വന്‍ പൊലീസ്​ സംഘം സ്ഥലത്തെത്തി. നിരവധി ആളുകളെ പൊലീസ്​ വിളിച്ച് വരുത്തി ചോദ്യം ചെയ്യുന്നുണ്ട്. വൈകീട്ട് നാലരയോടെ പ്രതിയെ സംഭവ സ്ഥലത്തെത്തിച്ച് തെളിവെടുപ്പ് നടത്തി. കൊച്ചി റീജനല്‍ ഫോറന്‍സിക് ലാബ് അസിസ്റ്റന്‍റ്​ ഡയറക്ടര്‍ സൂസന്‍ ആന്റണി, സയന്റിഫിക് ഓഫിസര്‍ പി.എം. ജോമോന്‍ എന്നിവരുടെ നേതൃത്വത്തില്‍ ശാസ്ത്രീയ പരിശോധന നടത്തി​. ജീവനെടുക്കുന്ന തോക്ക്​; പരിശോധന കർശനമാക്കുന്നു തൊടുപുഴ: തോക്കുകൾ ഉപയോഗിച്ചുള്ള അതിക്രമങ്ങൾ റിപ്പോർട്ട്​ ചെയ്യുന്ന സാഹചര്യത്തിൽ ​പൊലീസ്​ പരിശോധന കർശനമാക്കുന്നു​. തോക്ക്​ കൈവശം വെച്ച്​ ഉപയോഗിക്കുന്നവരെ​ നിരീക്ഷിക്കുന്നുണ്ടെങ്കിലും സമീപകാലത്ത്​ ഇത്തരം സംഭവങ്ങൾ ആവർത്തിക്കുന്ന സാഹചര്യത്തിലാണ്​ കൂടുതൽ പരിശോധനക്കൊരുങ്ങുന്നത്​​. തോക്കിന്റെ ലൈസൻസിന് അപേക്ഷിച്ചവർ, ലൈസൻസ് കിട്ടിയവർ ദുർവിനിയോഗം ചെയ്യുന്നുണ്ടോയെന്നതടക്കമുള്ള കാര്യങ്ങളാണ്​ പരിശോധിക്കുക. ജീവനും സ്വത്തിനും ഭീഷണിയുണ്ടെന്ന കാരണം പറഞ്ഞാണ് തോക്കുപയോഗിക്കാനുള്ള അനുമതിക്ക്​ വ്യക്തികൾ അപേക്ഷ നൽകുന്നത്. എന്നാൽ, ഇത്​ പലരും ദുരുപയോഗം ചെയ്യുന്നതായാണ്​ വിവരം. തോക്ക്​ ഉപയോഗിക്കാനാവശ്യമായ പരിശീലനം ലഭിക്കാതെ ഇത്തരം തോക്കുകൾ ഉപയോഗിക്കുന്നത് കൂടുതൽ അപകടങ്ങളുണ്ടാകാൻ സാധ്യതയുണ്ടെന്ന്​ വിദഗ്ധർ ചൂണ്ടിക്കാട്ടുന്നു. റവന്യൂ വകുപ്പിലാണ് ലൈസൻസിന് അപേക്ഷ നൽകുന്നതെങ്കിലും പൊലീസ്, വനം വകുപ്പ് ഉദ്യോഗസ്ഥരാണ് ഇതുസംബന്ധിച്ച അന്വേഷണം നടത്തുന്നത്. തോക്കിന് അപേക്ഷിച്ചയാൾ കുറ്റവാളിയാണോ, ഏതെങ്കിലും കേസിൽ ഉൾപ്പെട്ടിട്ടുണ്ടോ തുടങ്ങിയ വിവരങ്ങൾ അന്വേഷിച്ച ശേഷം നൽകുന്ന റിപ്പോർട്ടനുസരിച്ചാണ് ലൈസൻസ് നൽകുന്നത്. മുമ്പ്​​ വനം വകുപ്പിന്‍റെ പരിശോധനകളിൽ വ്യാജ തോക്കുകളും തിരകളും ജില്ലയിൽനിന്ന്​ കണ്ടെത്തിയിട്ടുണ്ട്​. ശനിയാഴ്ച രാത്രി മൂലമറ്റത്ത്​ നടന്ന സംഭവത്തിലും പ്രതിക്ക്​ തോക്ക്​ ഉപയോഗിക്കാനുള്ള ലൈസൻസ്​ ഉണ്ടായിരുന്നില്ലെന്നാണ്​ വിവരം​. തോക്ക്​ പൊലീസ്​ കസ്റ്റഡിയിലെടുത്തിട്ടുണ്ട്​.