മുല്ലപ്പെരിയാർ ഡാം ഉടൻ ഡീ കമീഷൻ ചെയ്യണം -സേവ് കേരള ബ്രിഗേഡ്

കട്ടപ്പന: മുല്ലപ്പെരിയാർ ഡാം ഉടൻ ഡീ കമീഷൻ ചെയ്യണമെന്ന് സേവ് കേരള ബ്രിഗേഡ് പ്രസിഡന്‍റ്​ അഡ്വ. റസൽ ജോയി വാർത്തസമ്മേളനത്തിൽ ആവശ്യപ്പെട്ടു. മുല്ലപ്പെരിയാർ വിഷയം ഒന്നര കോടി ജനങ്ങളുടെ ജീവന്‍റെ വിഷയമാണെന്ന തിരിച്ചറിവാണ് സേവ് കേരള ബ്രിഗേഡിനെ ഡാം എത്രയും പെട്ടെന്നുതന്നെ ഡീ കമീഷൻ ചെയ്യണമെന്ന് ആവശ്യപ്പെട്ട്​ സുപ്രീംകോടതിയിൽ കേസ് കൊടുക്കാൻ നിർബന്ധിതമാക്കിയത്. ഇടുക്കിയിലെ എല്ലാ തദ്ദേശ സ്വയംഭരണ സ്ഥാപനങ്ങളും സുപ്രീംകോടതിയിൽ ഇന്‍റർവീനിങ്​ പെറ്റീഷൻ ഫയൽചെയ്ത് കേസിൽ കക്ഷിചേരണം. ഇടുക്കി എം.പി ഡീൻ കുര്യാക്കോസ് സേവ് കേരള ബ്രിഗേഡിനെ പിന്തുണച്ച്​ ഇന്‍റർവീനിങ്​ പെറ്റീഷൻ സുപ്രീംകോടതിയിൽ ഫയൽ ചെയ്തത് പ്രത്യാശ നൽകുന്നു. തമിഴ്നാട്ടിലെ റിട്ടയേർഡ് എൻജിനീയേഴ്സ് അസോസിയേഷൻ തമിഴ്നാടിനെ പിന്തുണച്ച്​ ഇന്‍റർവീനിങ് പെറ്റീഷനുമായി സുപ്രീംകോടതിയിൽ എത്തിയത് മാതൃകയായി കാണണം. കവിത ജി. പിള്ള, സുമേഷ് ജോസഫ്, മാത്യു തുടങ്ങിയവരും വാർത്തസമ്മേളനത്തിൽ പങ്കെടുത്തു.