നല്ലതണ്ണി പുഴ ശുചീകരിച്ചു

മൂന്നാർ: ലോക ജലദിനത്തോട്​ അനുബന്ധിച്ച് സന്നദ്ധ സംഘടനകളുടെയും പരിസ്ഥിതി പ്രവര്‍ത്തകരുടെയും നേതൃത്വത്തില്‍ പുഴ ശുചീകരിച്ചു. മൂന്നാറിലെ നല്ലതണ്ണി പുഴയാണ് ശുചീകരിച്ചത്. ശുചീകരണ പ്രവര്‍ത്തനങ്ങള്‍ ദേവികുളം സബ് കലക്ടർ രാഹുല്‍ കൃഷ്ണശര്‍മ ഉദ്ഘാടനം ചെയ്തു. നല്ലതണ്ണി ജങ്​ഷനിൽനിന്ന്​ ടാറ്റാ ജനറല്‍ ആശുപത്രി വരെയുള്ള പുഴയുടെ ഇരുഭാഗങ്ങളും ശുചീകരിച്ചു. മൂന്നാര്‍ പഞ്ചായത്ത്, യു.എന്‍.ഡി.പി, ശുചിത്വ മിഷന്‍ എന്നിവയുടെ നേതൃത്വത്തിലായിരുന്ന ശുചീകരണ പരിപാടികള്‍ സംഘടിപ്പിച്ചത്. ലോക ജലദിനത്തോട്​ അനുബന്ധിച്ച് നടന്ന ശുചീകരണ പ്രവര്‍ത്തനങ്ങള്‍ ഒരു പുഴ ശുചീകരിക്കുക എന്നതിനപ്പുറം ദുരന്തനിവാരണ പ്രവര്‍ത്തനങ്ങള്‍കൂടി മുന്നില്‍കണ്ടാണെന്ന് സബ് കലക്ടർ രാഹുല്‍ കൃഷ്ണ പറഞ്ഞു. മൂന്നാര്‍ ഇന്‍റഗ്രൽ സോഷ്യല്‍ ട്രാന്‍സ്‌ഫൊര്‍മേഷന്‍ സൊസൈറ്റി, കുറിഞ്ഞി റെസി. അസോസിയേഷന്‍, മൂന്നാര്‍ എൻജിനീയറിങ്​ കോളജ്, തൊഴിലുറപ്പ് പദ്ധതി ജീവനക്കാര്‍ തുടങ്ങിയവര്‍ ശുചീകരണ പ്രവര്‍ത്തനങ്ങളില്‍ പങ്കെടുത്തു. മൂന്നാര്‍ ഗ്രാമപഞ്ചായത്ത് വൈസ് പ്രസിഡന്‍റ്​ എം. രാജേന്ദ്രന്‍, മിസ്റ്റ്​ ഡയറക്ടര്‍ ഫാ. ഫ്രാന്‍സിസ് കമ്പോളത്തുപറമ്പില്‍ തുടങ്ങിയവര്‍ പരിപാടികള്‍ക്ക് നേതൃത്വം നല്‍കി.