വഴിയില്‍കിടന്ന് കെ.എസ്.ആര്‍.ടി.സി; പ്രതിസന്ധിയിലായി യാത്രക്കാർ

അടിമാലി: വഴിയില്‍ കിടന്ന് റെക്കോഡിട്ട് കെ.എസ്.ആര്‍.ടി.സി. മൂന്നാര്‍-കുയിലിമല സര്‍വിസാണ് പതിവായി കേടായി വഴിയില്‍ കിടക്കുന്നത്. പൊതുജനങ്ങള്‍ക്കും ഉദ്യോഗസ്ഥര്‍ക്കും ജില്ല ആസ്ഥാനത്ത് എത്തുന്നതിന് ഗ്രാമീണ മേഖലയിലൂടെ സര്‍വിസ് നടത്തുന്ന കെ.എസ്.ആര്‍.ടി.സിക്കാണ്​ തകരാറും സർവിസ്​ മുടക്കവും പതിവായിരിക്കുന്നത്. തിങ്കളാഴ്ച മുരിക്കാശ്ശേരിക്ക് സമീപം ചിന്നാര്‍ പുഴയോരത്ത് കേടായി സര്‍വിസ് മുടങ്ങിയതാണ് ഒടുവിലത്തെ സംഭവം. കല്ലാര്‍കുട്ടിയില്‍നിന്ന്​ കമ്പിളിക്കണ്ടം, മുരിക്കാശ്ശേരി വഴിയാണ് ഈ സര്‍വിസ്. പൊതുവെ സ്വകാര്യ സര്‍വിസുകള്‍ കുറവായ ഈ പാതയില്‍ മുരിക്കാശ്ശേരിയിലെ സ്‌കൂള്‍, കോളജ് വിദ്യാർഥികളും ജില്ല ആസ്ഥാനത്തെ സര്‍ക്കാര്‍ ജീവനക്കാരും ഈ ബസിനെയാണ് ആശ്രയിക്കുന്നത്. ഇടുക്കി മെഡിക്കല്‍ കോളജ്, ജില്ല കലക്ടറുടെ കാര്യാലയം, ജില്ല പൊലീസ് മേധാവിയുടെ കാര്യാലയം, ഡിവൈ.എസ്.പി ഓഫിസ്​ തുടങ്ങി ജില്ലയിലെ പ്രധാന ഓഫിസുകളില്‍ വിവിധ ആവശ്യങ്ങൾക്ക്​ പോകുന്നവരും ഈ ബസിനെ ആശ്രയിക്കുന്നു. ബസ് പതിവായി പണിമുടക്കുന്നതോടെ ടാക്‌സികളിലോ സമാന്തര വാഹനങ്ങളിലോ കയറിയാണ് ലക്ഷ്യസ്ഥാനത്ത് എത്തുന്നത്. എന്നാല്‍, സ്‌കൂള്‍-കോളജ് വിദ്യാർഥികള്‍ക്ക് നടക്കുകയല്ലാതെ മറ്റ് മാര്‍ഗമില്ല. അടിയന്തരമായി അധികൃതര്‍ വിഷയത്തില്‍ ഇടപെടണമെന്നാണ് ആവശ്യം. മൂന്നാറില്‍നിന്ന് ആരംഭിച്ച് അടിമാലി, കല്ലാര്‍കുട്ടി, കമ്പിളിക്കണ്ടം, മുരിക്കാശ്ശേരി വഴിയാണ് ഈ ബസ് ജില്ല ആസ്ഥാനമായ കുഴിലിമലയില്‍ എത്തുന്നത്. idl adi 1 k s r t c ചിത്രം. തകരാറിലായതിനെത്തുടര്‍ന്ന് മുരിക്കാശ്ശേരിക്ക് സമീപം വഴിയരികില്‍ ഒതുക്കിയിട്ടിരിക്കുന്ന കെ.എസ്.ആര്‍.ടി.സി ബസ്