ആറാംമൈല്‍-കള്ളകുട്ടികുടി റോഡിൽ ദുരിതയാത്ര

അടിമാലി: മാങ്കുളം പഞ്ചായത്തിലെ ജനവാസ കേന്ദ്രങ്ങളിലൂടെ കടന്നുപോകുന്ന ആറാംമൈല്‍ - കള്ളകുട്ടികുടി റോഡ്​ തകര്‍ന്ന് കാല്‍നട ദുഷ്കരം. പഞ്ചായത്തിലെ രണ്ട്​, മൂന്ന്​ ,നാല്​ വാര്‍ഡുകളിലെ ഭൂരിഭാഗം ജനങ്ങളുടെയും ഏക ആശ്രയമായിരുന്ന ഈ റോഡ്. 2018 ലെ മഹാപ്രളയത്തിലും ഉരുള്‍പൊട്ടലിലുമാണ് തകര്‍ന്നത്. റോഡി‍ൻെറ പുനര്‍നിര്‍മാണം റീബിൽഡ്​ കേരളയില്‍ ഉള്‍പ്പെടുത്തിയിട്ടുണ്ടെന്നും ഉടന്‍ നിര്‍മാണം ആരംഭിക്കുമെന്നും ത്രിതല പഞ്ചായത്ത്​ ജനപ്രതിനിധികള്‍ പറയുന്നുണ്ടെങ്കിലും നടപടിയില്ല. അതി സാഹസികമായാണ്​ ഇതുവഴി വാഹനങ്ങൾ ഓടിക്കുന്നത്​. വാഹനാപകടങ്ങളും ഇവിടെ പതിവ്​ കാഴ്ചയാണ്. അപകടങ്ങളില്‍ ഗുരുതര പരിക്കേല്‍ക്കുന്നവരും ധാരാളം. ഇതോടെ ടാക്‌സി വാഹനങ്ങള്‍ പോലും ഈ പാതയിലൂടെ ഓടാന്‍ തയാറല്ല. ആറാംമൈലില്‍നിന്ന് കള്ളകുട്ടികുടി വരെ ആറുകിലോമീറ്റര്‍ ദൂരമാണ് റോഡിനുള്ളത്. സിങ്കുകുടി, ശേവല്‍കുടി, സുബ്രമണ്യന്‍കുടി, ചിക്കണംകുടി എന്നീ ആദിവാസി കോളനിക്കാരുടെയും ഏക ആശ്രയം ഈ റോഡ് മാത്രമാണ്. റോഡിനായി നിരവധി സമരങ്ങള്‍ നാട്ടുകാര്‍ ചെയ്തിട്ടുണ്ട്. ജനങ്ങൾ സ്വന്തമായി അറ്റകുറ്റപ്പണികളും നടത്തിയിട്ടുണ്ട്. പഞ്ചായത്തിലെ ഏക സര്‍ക്കാര്‍ സ്‌കൂളും മൂന്ന് അംഗന്‍വാടികളും ഈ പാതയിലുണ്ട്. ഇവിടേക്കെത്തുന്നവരും മാങ്കുളം പഞ്ചായത്ത് ആസ്ഥാനത്തേക്ക് എത്തുന്നവരും കാര്‍ഷിക ഉൽപന്നങ്ങൾ വില്‍ക്കാന്‍ എത്തുന്നവരുമെല്ലാം ഈ ദുരിതപാത താണ്ടണം. ചെറിയോരു മഴ പെയ്താല്‍ വെള്ളം കെട്ടിനില്‍ക്കുന്ന സാഹചര്യമാണ്​. idl adi 1 road news ചിത്രം- തകര്‍ന്ന ആറാംമൈല്‍ - കള്ളകുട്ടികുടി റോഡ്