രവീന്ദ്രൻ പട്ടയം: കുഞ്ചിത്തണ്ണി വില്ലേജിലെ ഹിയറിങ്​ ഇന്ന്​

മൂന്നാർ: രവീന്ദ്രൻ പട്ടയങ്ങൾ റദ്ദാക്കുന്നതുമായി ബന്ധപ്പെട്ട രണ്ടാം ഘട്ട ഹിയറിങ്​ തിങ്കളാഴ്ച നടക്കും. കുഞ്ചിത്തണ്ണി വില്ലേജിലെ പട്ടയ ഉടമകളുടെ ഹിയറിങ്ങാണ് ദേവികുളത്ത് നടക്കുന്നത്. വില്ലേജിലെ 35 പട്ടയ ഉടമകളോടാണ് തിങ്കളാഴ്ച ഹാജരാകാൻ ആവശ്യപ്പെട്ടിട്ടുള്ളത്. ദേവികുളം ആർ.ഡി.ഒ ഓഫിസിലെ കോൺഫറൻസ് ഹാളിലാണ് ഹിയറിങ്​. ഒരാഴ്ച മുമ്പ് മറയൂർ, കാന്തല്ലൂർ, കീഴാന്തൂർ വില്ലജുകളിലെ പട്ടയ ഉടമകളുടെ ഹിയറിങ്​ നടത്തിയിരുന്നു. കലക്ടർ ഷീബ ജോർജ് നേരിട്ട് നടത്തിയ ഹിയറിങ്ങിൽ 37 പേർക്ക് നോട്ടീസ് നൽകിയെങ്കിലും 25 പേർ മാത്രമാണ് എത്തിയത്. ബാക്കിയുള്ളവർക്ക് ഒരു അവസരംകൂടി നൽകുമെന്ന് തഹസിൽദാർ ഷാഹിന രാമകൃഷ്ണൻ അറിയിച്ചു. ബാക്കി വില്ലേജുകളിലെ ഭൂവുടമകളെ അടുത്ത ഘട്ടത്തിൽ വിളിക്കുമെന്നും തഹസിൽദാർ അറിയിച്ചു.