മടങ്ങിവരണം, മലങ്കര ഫെസ്റ്റ്​

മുട്ടം: മലങ്കര ഡാമിനോട് ചുറ്റപ്പെട്ട വിശാലമായ പ്രദേശങ്ങളുടെ വികസനം യാതാർഥ്യമാക്കാൻ മുട്ടത്ത് വീണ്ടും ടൂറിസം ഫെസ്റ്റ് സംഘടിപ്പിക്കണമെന്ന് ആവശ്യം ശക്തമായി. കോവിഡ് മഹാമാരിക്ക് മുമ്പ്​ രണ്ടുതവണ തുടർച്ചയായി നടത്തിയ മലങ്കര ഫെസ്റ്റ് കോവിഡിൽ മുടങ്ങുകയായിരുന്നു. മലങ്കര ഫെസ്റ്റ് വഴി ഈ പ്രദേശത്തെ ടൂറിസം മേഖലയിൽ കുതിച്ചുചാട്ടം ഉണ്ടാവുകയും ആയിരക്കണക്കിന് ജനങ്ങൾ ഇവിടേക്ക് ഒഴുകിയെത്തുകയും ചെയ്തിരുന്നു. തൊടുപുഴ സർവിസ് സഹകരണ ബാങ്ക് മലങ്കര ജലാശയത്തിൽ ബോട്ടിങ് നടത്താൻ സന്നദ്ധത പ്രകടിപ്പിച്ച്​ അപേക്ഷ നൽകി കാത്തിരിക്കുകയുമാണ്. കോടികൾ മുടക്കി രണ്ട് ബോട്ട് ഇറക്കാനാണ് സന്നദ്ധത അറിയിച്ചിട്ടുള്ളത്. മലങ്കര മുതൽ അറക്കുളം വരെ പരന്നുകിടക്കുന്ന ജലാശയവും സമീപത്തായുള്ള ഇലവീഴാപൂഞ്ചിറ, കാഞ്ഞാർ പാർക്ക്, പച്ചിലാംകുന്ന് വ്യൂ പോയിന്‍റ്​, ത്രിവേണി സംഗമം, പെരുംകൊഴുപ്പ് ടൂറിസം മേഖല എന്നിവയെ എല്ലാം കോർത്തിണക്കി ഫെസ്റ്റ് സംഘടിപ്പിച്ചാൽ മുട്ടം, കുടയത്തൂർ, അറക്കുളം, വെള്ളിയാമറ്റം പഞ്ചായത്തുകളുടെ ടൂറിസം വികസനത്തിന് സഹായകമാകും. വ്യാപാര മേഖലക്കും ഇത്​ ഉണർവേകും. മലങ്കര ഡാമിനോട് ചേർന്ന് പണികഴിപ്പിച്ച ബോട്ട് ജട്ടിയും മൂന്നുകോടി രൂപ മുടക്കി നിർമിച്ച എൻട്രൻസ് പ്ലാസയും അടഞ്ഞുകിടക്കുകയാണ്. tdl mltm മുമ്പ്​ നടത്തിയ മലങ്കര ഫെസ്റ്റിന്‍റെ ദൃശ്യം (ഫയൽ ചിത്രം)