പാർട്ടിക്ക്​ ഇടുക്കിയുടെ കരുത്തായി ഇവർ

തൊടുപുഴ: 2012ൽ സി.പി.എം ഇടുക്കി ജില്ല സെക്രട്ടറിയായിരുന്ന എം.എം. മണി വിവാദ 'വൺ ടു ത്രീ' പ്രസംഗത്തെത്തുടർന്ന്​ അറസ്റ്റിലായപ്പോൾ ഒരു വർഷത്തേക്ക്​ സെക്രട്ടറിയുടെ ചുമതല കെ.കെ. ജയച​ന്ദ്രനായിരുന്നു. ഇപ്പോൾ സംസ്ഥാന സെക്രട്ടേറിയറ്റിൽനിന്ന്​ എം.എം. മണിയെ ഒഴിവാക്കുമ്പോൾ പകരക്കാരനായി എത്തുന്നത്​ അതേ ജയചന്ദ്രൻ തന്നെ. സി.പി.എം സംസ്ഥാന നേതൃത്വത്തിന്​ കരുത്താകാൻ ജയചന്ദ്രൻ ഉൾ​പ്പെടെ മൂന്ന്​ പേർക്കാണ്​ ജില്ലയിൽനിന്ന്​ നിയോഗം. സംസ്ഥാന സമിതിയിലെ പുതുമുഖമായ നിലവിലെ ജില്ല സെക്രട്ടറി സി.വി. വർഗീസും നിലവിലെ സംസ്ഥാന സമിതിയംഗം കെ.പി. മേരിയുമാണ്​ മറ്റ്​ രണ്ടുപേർ. വെള്ളത്തൂവൽ കുന്നത്ത് കൃഷ്ണൻ- ജാനകി ദമ്പതികളുടെ മകനാണ്​ 70കാരനായ ജയചന്ദ്രൻ. കെ.എസ്.വൈ.എഫിലൂടെയാണ് പൊതുരംഗത്തെത്തിയ ഇദ്ദേഹം 1970ൽ സി.പി.എം അംഗമായി. 1982ൽ ജില്ല കമ്മിറ്റിയംഗവും തുടർന്ന്​ ജില്ല സെക്രട്ടേറിയറ്റംഗവും. 1989- 95 കാലയളവിൽ സി.ഐ.ടി.യു ജില്ല സെക്രട്ടറിയായിരുന്നു. 1995ലാണ്​ ആദ്യമായി ജില്ല സെക്രട്ടറി സ്ഥാനത്തെത്തുന്നത്​. 2015ലെ മൂന്നാർ സമ്മേളനത്തിലും 2018ലെ കട്ടപ്പന സമ്മേളനത്തിലും ജില്ല സെക്രട്ടറിയായി. 2001മുതൽ തുടർച്ചയായി മൂന്ന്​ തവണ നിയമസഭയിൽ ഉടുമ്പൻചോലയുടെ പ്രതിനിധിയായി. സെറിഫെഡ് ചെയർമാനായും പ്രവർത്തിച്ചു. നിലവിൽ സി.ഐ.ടി.യു സംസ്ഥാന വൈസ് പ്രസിഡന്‍റും കേരള പ്ലാന്‍റേഷൻ ലേബർ ഫെഡറേഷൻ സംസ്ഥാന പ്രസിഡന്‍റുമാണ്. കുഞ്ചിത്തണ്ണിയിലാണ്​ താമസം. ഭാര്യ: ശ്രീദേവി. മക്കൾ: നീതു, അനന്തു. മരുമക്കൾ: ഗിരീഷ്, നമിത. കുടിയേറ്റ കർഷകത്തൊഴിലാളിയായ തങ്കമണി ചെള്ളക്കുഴിയിൽ വർഗീസ്-ഏലിയാമ്മ ദമ്പതികളുടെ മൂന്നാമത്തെ മകനാണ് സി.വി. എന്ന് സുഹൃത്തുക്കൾ വിളിക്കുന്ന സി.വി. വർഗീസ്. കോട്ടയം ജില്ലയിലെ പെരുമ്പനച്ചിയിൽനിന്ന്​ കട്ടപ്പനയിലേക്ക്​ കുടിയേറി പിന്നീട് തങ്കമണിയിൽ സ്ഥിരതാമസമാക്കിയതാണ്​ വർഗീസിന്‍റെ കുടുംബം. 1981ൽ തങ്കമണി ലോക്കൽ സെക്രട്ടറിയും 1984ൽ ഇടുക്കി ഏരിയ കമ്മിറ്റിയംഗവും 1997ൽ ഏരിയ സെക്രട്ടറിയുമായി. കർഷകപ്രക്ഷോഭങ്ങൾ ഉൾപ്പെടെ സമരങ്ങളിൽ നിരവധി തവണ പൊലീസ്​ മർദനം ഏറ്റുവാങ്ങി. ജയിൽവാസവും അനുഭവിച്ചിട്ടുണ്ട്. ഭാര്യ: ജിജിമോൾ. മക്കൾ: ജീവാമോൾ, അമൽ. മരുമകൻ: സജിത്. കെ.പി. മേരി മൂന്നാം തവണയാണ്​ സംസ്ഥാന സമിതിയിൽ. TDL KK Jayachandran കെ.കെ. ജയചന്ദ്രൻ TDL CV Varghese സി.വി. വർഗീസ്​ TDL KP Mary കെ.പി. മേരി