മാങ്കുളം പൊലീസ് എയ്​ഡ്​പോസ്റ്റ്​ പ്രവര്‍ത്തനം അവതാളത്തില്‍

അടിമാലി: മാങ്കുളത്ത് പൊലീസ് എയ്​ഡ്​പോസ്റ്റിന്‍റെ പ്രവര്‍ത്തനം അവതാളത്തില്‍. എസ്.ഐയുടെ നേതൃത്വത്തില്‍ ഏഴ്​ പൊലീസുകാരുണ്ടായിരുന്ന ഇവിടെ നാല് പേരിലേക്ക് ഡ്യൂട്ടി കുറച്ചു. ഇതിന് പുറമെ ഒരാള്‍ അവധിയില്‍ പോയതോടെ ഈ എയ്ഡ്‌പോസ്റ്റിന്റെ പ്രവര്‍ത്തനം നിലക്കുകയും ചെയ്തു. പൊലീസ് ജീപ്പ് തകരാറിലായത് വിദൂരസ്ഥലങ്ങളില്‍ ക്രമസമാധാനം നിയന്ത്രിക്കാനും രാത്രി പട്രോളിങ്​ ഉള്‍പ്പെടെ തടസ്സപ്പെടാനും ഇടയാക്കി. മൂന്നാര്‍ പൊലീസ് സ്റ്റേഷന് കീഴിലാണ് എയ്ഡ്‌പോസ്റ്റ്. ദേവികുളം താലൂക്കില്‍ ചാരായ-കഞ്ചാവ് കേസുകളും കൊലപാതങ്ങളും അക്രമങ്ങളും അടുത്തിടെ റിപ്പോർട്ട്​ ചെയ്യുന്നുണ്ട്​. മാങ്കുളത്തുനിന്ന്​ ആനക്കുളത്തേക്ക് പോകുന്ന റോഡരികിൽ അപകടാവസ്ഥയിലുള്ള കെട്ടിടത്തിലാണ് മാങ്കുളം പൊലീസ് എയ്ഡ്‌പോസ്റ്റ് പ്രവര്‍ത്തിക്കുന്നത്. കുടിവെള്ളവും അടിസ്ഥാന സൗകര്യങ്ങളുമില്ല. ഇവിടെ പൊലീസുകാര്‍ക്ക്​ പ്രാഥമികാവശ്യങ്ങള്‍ നിറവേറ്റാന്‍ മറ്റ് സ്ഥലങ്ങളില്‍ പോകേണ്ട സ്ഥിതിയാണ്​.