ജില്ലയിലെ ഒമ്പത്​ സ്​കൂളുകളിൽ കലാവസ്ഥ സ്​റ്റേഷനുകൾ

തൊടുപുഴ: മഴയുടെ അളവ്, കാറ്റിന്‍റെ വേഗത, അന്തരീക്ഷ മർദം, താപനില എന്നിവയുടെ കൃത്യമായ വിവരങ്ങളും മാറ്റങ്ങളും സ്കൂളിലിരുന്ന്​​ ഇനി കുട്ടികൾക്കറിയാം. സ്​കൂളുകളിൽ സമഗ്രശിക്ഷ കേരളയുടെ പിന്തുണയോടെയാണ്​ ദിനാവസ്ഥ നിരീക്ഷണ കേന്ദ്രങ്ങൾ (വെതർ സ്​റ്റേഷൻ) സ്ഥാപിക്കാനൊരുങ്ങുന്നത്​​. ഹയർ സെക്കൻഡറി വിഭാഗത്തിൽ ജിയോഗ്രഫി വിഷയം പഠിപ്പിക്കുന്ന ഇടുക്കി ജില്ലയിലെ ഒമ്പത്​ ഗവ. ഹയർ സെക്കൻഡറി സ്കൂളുകളിലാണ്​ വെതർ സ്​റ്റേഷനുകൾ സ്ഥാപിക്കുക. കുട്ടികൾ നടത്തുന്ന നിരീക്ഷണങ്ങൾ വിദ്യാലയങ്ങളിൽ തയറാക്കിയിരിക്കുന്ന ചാർട്ടുകളിൽ രേഖപ്പെടുത്തും. ഓരോ സമയത്തും കാലാവസ്ഥയിൽ പ്രദേശികമായി സംഭവിക്കുന്ന മാറ്റം നിർണയിച്ച്​ ജനങ്ങൾ​ക്ക്​ കൈമാറാൻ കഴിയും. സൂക്ഷ്മതല കാലാവസ്ഥ നിരീക്ഷണത്തിലൂടെ ശേഖരിക്കുന്ന വിവരങ്ങൾ വിദ്യാർഥികൾക്കും സമൂഹത്തിനും പ്രയോജനപ്പെടുത്തുകയാണ്​ ലക്ഷ്യം. ശേഖരിച്ച പ്രാഥമിക വിവരങ്ങൾ സ്​കൂൾ വിക്കിയിലും വിശദമായ വിവരങ്ങൾ സമഗ്രശിക്ഷ കേരളയുടെ വെബ്സൈറ്റിലും പ്രസിദ്ധീകരിക്കും. 13 ഉപകരണങ്ങൾ സ്കൂളിൽ സജ്ജീകരിക്കും ജില്ലയിൽ ജി.എച്ച്.എസ്​.എസ്​ ദേവികുളം, ജി.എച്ച്.എസ്​.എസ്​ കല്ലാർ, ജി.എച്ച്.എസ്​.എസ്​ കുമളി, ജി.എച്ച്.എസ്​.എസ്​ മുരിക്കാട്ടുകുടി, സി.പി.എം ജി.എച്ച്.എസ്​.എസ്​ പീരുമേട്, ജി.എച്ച്.എസ്​.എസ്​ പൂമാല, ജി.എച്ച്.എസ്​.എസ്​ രാജാക്കാട്, ജി.എച്ച്.എസ്​.എസ്​ തൊടുപുഴ, ജി.എച്ച്.എസ്​.എസ്​ വെള്ളത്തൂവൽ എന്നീ സ്​കൂളുകളാണ് വെതർ സ്റ്റേഷനുകൾ സ്ഥാപിക്കുന്നതിനായി തെരഞ്ഞെടുത്തിട്ടുള്ളത്. ഇതിനായി വിവിധ ഉപകരണങ്ങൾ വാങ്ങുന്നതിനായി ഓരോ വിദ്യാലയത്തിനും എസ്​.എസ്​.കെ 13,300/ രൂപ വീതം അനുവദിക്കും. തെർമോ മീറ്റർ, വെറ്റ് ഡ്രൈബൾബ്​ തെർമോമീറ്റർ, ഡിജിറ്റൽ ഹ്യുമിഡിറ്റി, ഹൈഗ്രോമീറ്റർ, ഡിജിറ്റൽ ആൾട്ടിമീറ്റർ വിത്ത്​ ഡിജിറ്റൽ കോമ്പസ്​, ബാരോ മീറ്റർ, വെതർ ഫോർകാസ്റ്റർ, മഴമാപിനി, വിൻഡ് വേവ്, മിനിമം മാക്സിമം തെർമോമീറ്റർ, വെതർ ഡാറ്റാ ബുക്ക്, വെതർ ഡാറ്റാ ഡിസ്​പ്ലേ ബോർഡ് തുടങ്ങിയ 13 ഉപകരണങ്ങൾ ഇതിന്‍റെ ഭാഗമായി സ്​കൂളുകളിൽ സജ്ജീകരിക്കും. ഇവ ഉപയോഗിച്ച് ഓരോ ദിവസത്തെയും ദിനാവസ്ഥയിലും കാലാവസ്ഥയിലും ഉണ്ടാകുന്ന വ്യതിയാനങ്ങൾ മനസ്സിലാക്കാൻ കഴിയുമെന്നും അധികൃതർ പറഞ്ഞു. അധ്യാപകർക്ക്​ പരി​ശീലനം കർമപദ്ധതികളും പദ്ധതിയുടെ വിജയത്തിനായി വിദ്യാലയങ്ങളിലെ അധ്യാപകർക്ക്​ പ്രത്യേക പരിശീലനം നൽകും. വിദ്യാർഥികളെ മുഴുവൻ പരി​ശീലിപ്പിച്ച്​ ഓരോ ദിവസത്തെ ചുമതലയും കൈമാറി സ്​റ്റേഷനുകൾ സജീവമാക്കാനാണ്​ കർമപദ്ധതികളും തയാറാക്കും. പ്രകൃതി ദുരന്തം ആവർത്തിക്കുന്ന സാഹചര്യത്തിലാണ്​ നവതലമുറക്ക്​ കാലാവസ്ഥ നിരീക്ഷണത്തിൽ ആഴത്തിൽ അറിവുണ്ടാക്കുകയാണ്​ വെതർ സ്​റ്റേഷനുകൾകൊണ്ട്​ ലക്ഷ്യമിടുന്നത്​.