ഏലം സ്‌റ്റോറിലെ സ്‌ഫോടനം: ജീവനക്കാരന് കേൾവി നഷ്ടമായി

നെടുങ്കണ്ടം: കോമ്പയാറില്‍ സ്‌ഫോടനമുണ്ടായ ഏലം സ്‌റ്റോറിനുള്ളില്‍ കിടന്നുറങ്ങിയ അന്തർ സംസ്ഥാന തൊഴിലാളിയുടെ​ ഒരു ​ചെവിയുടെ കേൾവി നഷ്ടമായി. കര്‍ണപുടത്തിനേറ്റ ക്ഷതമാണ്​ കാരണം. സ്‌റ്റോർ ജീവനക്കാരന്‍ മധ്യപ്രദേശ് സ്വദേശി രോഹിതിനാണ്​ (19) പരിക്കേറ്റത്. സ്ഫോടന ശബ്ദം കേട്ടതോടെ ചെവിക്ക് ​ചില അസ്വസ്ഥത അനുഭവപ്പെട്ടുതുടങ്ങിയിരുന്നു. തുടര്‍ന്ന്​ ആശുപത്രിയില്‍ എത്തിച്ചപ്പോഴാണ് കേള്‍വി നഷ്ടപ്പെട്ടതായി ഡോക്ടര്‍മാര്‍ പറഞ്ഞത്. സ്‌റ്റോറിനുള്ളിലെ മുറിയില്‍ തറയില്‍ പായ്​ വിരിച്ചാണ്​ കിടന്നിരുന്നത്. സ്‌ഫോടനത്തിൽ ജനൽച്ചില്ല് തെറിച്ച്​ മുഖത്ത് പതിച്ചും​ ചെറിയ മുറിവുമുണ്ട്. സ്​ഫോടനം നടക്കുമ്പോള്‍ നിലത്ത് കിടന്നതിനാല്‍ വന്‍ അപകടം ഒഴിവായതായാണ് വിലയിരുത്തല്‍. അല്ലെങ്കില്‍ കതകി‍ൻെറ പാളി ദേഹത്ത് പതിക്കുമായിരുന്നു.