ഏലം സ്റ്റോറില്‍ സ്‌ഫോടനവും അഗ്‌നിബാധയും; നാലര ലക്ഷം രൂപയുടെ നഷ്ടം

നെടുങ്കണ്ടം: കോമ്പയാറില്‍ ഏലം സ്റ്റോറില്‍ വന്‍ ശബ്ദത്തോടെ സ്‌ഫോടനവും അഗ്‌നിബാധയും. സംഭവത്തിൽ നാലര ലക്ഷം രൂപയുടെ നഷ്ടമാണ്​ കണക്കാക്കുന്നത്​. സ്ഥലത്ത്​ താമസിച്ചിരുന്ന ​അന്തർസംസ്ഥാന തൊഴിലാളി നിസ്സാര പരിക്കുകളോടെ രക്ഷപ്പെട്ടു. കോമ്പയാര്‍ ബ്ലോക്ക് നമ്പര്‍ 738ല്‍ ഇ.എച്ച്.​ മുഹമ്മദ് ബഷീറിന്‍റെ ഉടമസ്ഥതയിലുള്ള ഗ്രീന്‍ ഗോള്‍ഡ് കാര്‍ഡമം ഡ്രയറിലാണ്​ സ്‌ഫോടനം നടന്നത്. ഏലം ഡ്രയര്‍ ജീവനക്കാരന്‍ മധ്യപ്രദേശ് സ്വദേശി രോഹിത്തിനാണ്​ (19) നിസ്സാര പരിക്കേറ്റത്. തിങ്കളാഴ്ച പുലര്‍ച്ച 3.20ഓടെയാണ്​ സംഭവം. ഏലം ഡ്രയറിന്‍റെ വാതിലും നാല്​ ജനലും ഷട്ടറും സ്​ഫോടനത്തിൽ ചിതറിത്തെറിച്ചു. വീടിനോട് ചേര്‍ന്നാണ് ഡ്രയര്‍ സ്ഥിതി ചെയ്യുന്നത്. ഏലക്ക ഉണക്കി ഒരു മുറിയില്‍ കാറ്റുകടക്കാത്ത വിധം സൂക്ഷിച്ചിരുന്നു. ആ മുറിയിലാണ്​ സ്‌ഫോടനം നടന്നത്​. സ്‌ഫോടനത്തില്‍ ചില്ലുകള്‍ തെറിച്ചാണ് ഉറങ്ങിക്കിടക്കുകയായിരുന്ന രോഹിത്തിന് പരിക്കേറ്റത്. 150 കിലോ ഉണക്ക ഏലക്കയും 50 കിലോ കുരുമുളകും കത്തിനശിച്ചു. സമീപവാസികളാണ്​ തീയണച്ചത്​. ഒന്നര വര്‍ഷം മുമ്പാണ് ബഷീര്‍ ഡ്രയര്‍ ആരംഭിച്ചത്. സ്‌ഫോടനത്തെ തുടര്‍ന്ന്​ ഷട്ടര്‍ തെറിച്ചുവീണ്​ മുന്‍വശത്ത് പാര്‍ക്ക് ചെയ്തിരുന്ന കാറിന്‍റെ ഗ്ലാസ് തകര്‍ന്നു. ആരോ തീ ഇട്ടതാണെന്നാണ് സംശയം. നെടുങ്കണ്ടം പൊലീസ് അന്വേഷണം ആരംഭിച്ചു. ബഷീറിന്‍റെ പരാതിയെത്തുടര്‍ന്ന് കട്ടപ്പന ഡിവൈ.എസ്.പി വി.എ. നിഷാദ്‌മോന്‍, സ്‌പെഷല്‍ ബ്രാഞ്ച് ഡിവൈ.എസ്.പി പയസ് ജോര്‍ജ്​, നെടുങ്കണ്ടം സി.ഐ ബി.എസ്. ബിനു, എസ്.ഐ അജയകുമാര്‍ എന്നിവരടങ്ങിയ സംഘവും വിരലടയാള വിദഗ്​ധരും ബോംബ് സ്‌ക്വാഡും ഫോറന്‍സിക് വിഭാഗവും സ്ഥലത്ത് പരിശോധന നടത്തി. idl ndk ഏലം സ്​റ്റോറിലെ സ്‌ഫോടനം വിരലടയാള വിദഗ്ധര്‍ പരിശോധിക്കുന്നു