കാട്ടുതീയില്‍ അകപ്പെട്ട വിനോദസഞ്ചാരികളെ വനപാലകർ രക്ഷിച്ചു

പെട്ടിമുടിയിലാണ് 40 പേർ കാട്ടുതീക്ക് മുന്നില്‍ അകപ്പെട്ടത് അടിമാലി: മലകയറി എത്തിയ സഞ്ചാരികള്‍ കാട്ടുതീക്ക് മുന്നില്‍ അകപ്പെട്ടു. വനപാലകരെത്തിയാണ്​ രക്ഷിച്ചത്​. അടിമാലി റേഞ്ചിലെ പെട്ടിമുടിയിലാണ് 40 പേർ കാട്ടുതീക്ക് മുന്നില്‍ അകപ്പെട്ടത്. പെട്ടിമുടിക്ക് താഴെ മലഞ്ചെരുവിൽ ഞായറാഴ്ച രാവിലെ എട്ടിനാണ്​ സംഭവം. പുലര്‍ച്ച സൂര്യോദയം കാണുന്നതിനാണ്​ സഞ്ചാരികള്‍ മൂന്ന് മണിക്കൂറിലേറെ സാഹസികയാത്ര ചെയ്ത് പെട്ടിമുടിക്ക്​ താഴെ എത്തിയത്​. തണുപ്പും വശ്യമനോഹര കാഴ്ചകളും നിറഞ്ഞ പെട്ടിമുടിയില്‍ പുല്‍മേടുകളാണ് കൂടുതല്‍. കടുത്തവേനലില്‍ പുല്‍മേടുകള്‍ ഉണങ്ങിനില്‍ക്കുകയാണ്. ഇതിലേക്കാണ് ഞായറാഴ്ച രാവിലെ തീ പടര്‍ന്ന് പിടിച്ചത്. ഇതോടെ പരിഭ്രാന്തരായ സഞ്ചാരികള്‍ വനം വകുപ്പിന്റെ സഹായം തേടുകയായിരുന്നു. റേഞ്ച് ഓഫിസര്‍ കെ.വി. രതീഷ്‌ കുമാര്‍, സെക്​ഷന്‍ ഫോറസ്റ്റ് ഓഫിസര്‍ അബൂബക്കര്‍ സിദ്ദീഖ് എന്നിവരുടെ നേതൃത്വത്തില്‍ മച്ചിപ്ലാവ് സ്​റ്റേഷനില്‍നിന്നും കൂമ്പന്‍പാറ ഓഫിസില്‍നിന്നും വനംവകുപ്പ് ജീവനക്കാരും ഫയര്‍ വാച്ചര്‍മാരും ഉ​ൾപ്പെടെയുള്ളവര്‍ ഇവിടെയെത്തി കാട്ടുതീ നിയന്ത്രണ വിധേയമാക്കുകയായിരുന്നു. ഇതിന് ശേഷം സ്ത്രീകള്‍ അടക്കം വിനോദസഞ്ചാരികളെ സുരക്ഷിതമായി തിരിച്ചിറക്കി. അടിമാലി കൂമ്പന്‍പാറയില്‍നിന്ന്​ അപകടം പിടിച്ചതും ദുര്‍ഘടവുമായ കയറ്റം കയറിവേണം പെട്ടിമുടിയിലെത്താന്‍. ചെറിയ അശ്രദ്ധതന്നെ ദുരന്തങ്ങള്‍ക്ക് കാരണമാകുന്ന സ്ഥലവുമാണ്. പെട്ടിമുടിക്ക്​ മുകളിലെത്തിയാല്‍ നോക്കെത്താ ദൂരത്തോളം പടര്‍ന്നുകിടക്കുന്ന ദൃശ്യങ്ങളും മറ്റും ഏവരുടെയും മനംകവരുന്ന കാഴ്ചയാണ്. വിനോദസഞ്ചാരികളുടെ കുത്തൊഴുക്കുതന്നെ ഇവി​ടേക്കുണ്ട്. പരിസ്ഥിതി സംരക്ഷണത്തിന്‍റെ പ്രാധാന്യവും അപകട സൂചന മുന്നറിയിപ്പ് നല്‍കിയും വനം വകുപ്പ് ഇവിടെ ബോര്‍ഡുകള്‍ സ്ഥാപിച്ചിരുന്നു. എന്നാല്‍, ഇവയൊന്നും ഇപ്പോഴില്ല. പഞ്ചായത്തുമായി ചേര്‍ന്ന് പുതിയ പദ്ധതികള്‍ ആവിഷ്കരിച്ച്​ പെട്ടിമുടിയുടെ ടൂറിസം സാധ്യതകൾ വികസിപ്പിക്കാൻ നടപടി സ്വീകരിക്കുമെന്ന്​ റേഞ്ച് ഓഫിസര്‍ അറിയിച്ചു. ഞായറാഴ്ച കാട്ടുതീയില്‍ പെട്ടവര്‍ തലനാരിഴക്കാണ് രക്ഷപ്പെട്ടത്. വനപാലകരുടെ സമയോചിത ഇടപെടലാണ്​ ദുരന്തം ഒഴിവാക്കിയത്​. idl adi 1 pettymudi ചിത്രങ്ങല്‍- പെട്ടിമുടിയില്‍ കാട്ടുതീയില്‍ അകപ്പെട്ട സഞ്ചാരികളെ വനപാലകര്‍ സുരക്ഷിത കേന്ദ്രത്തിലേക്ക് മാറ്റുന്നു lead 4