മഹിള അസോസിയേഷൻ എം.എം. മണിയുടെ വീട്ടിലേക്ക്​ മാർച്ച്​ നടത്തട്ടെ -കോൺഗ്രസ്​

അടിമാലി: ജനാധിപത്യ മഹിള അസോസിയേഷൻ കോൺഗ്രസിനെതിരെ പ്രകടനം നടത്തുന്നതിന് പകരം എം.എം. മണി എം.എൽ.എയുടെ വീട്ടിലേക്കാണ് പ്രതിഷേധം സംഘടിപ്പിക്കേണ്ടതെന്ന് ബൈസൺവാലി മണ്ഡലത്തിലെ കോൺഗ്രസ് നേതാക്കൾ വാർത്തസമ്മേളനത്തിൽ പറഞ്ഞു. സ്ത്രീവിരുദ്ധ പരാമർശം നടത്തിയെന്ന്​ പറഞ്ഞ്​ കോൺഗ്രസ് നേതാക്കൾക്കെതിരെ പൊലീസ്​ കള്ളക്കേസെടുക്കുകയാണ്. കഴിഞ്ഞ ദിവസം ജനകീയപ്രശ്നങ്ങൾ ഉയർത്തിക്കാട്ടി ബൈസൺവാലിയിൽ കോൺഗ്രസിന്റെ നേതൃത്വത്തിൽ ധർണ നടത്തിയിരുന്നു. സി.പി.എം നേതൃത്വം കൊടുക്കുന്ന മഹിള അസോസിയേഷൻ കരിങ്കൊടിയേന്തി പ്രകോപനപരമായ മുദ്രാവാക്യം മുഴക്കിയ സമരത്തിനുനേരെ വന്നു. എന്നാൽ, ഇത് തടയാൻ പൊലീസ് തയാറായില്ലെന്നും രാഷ്ട്രീയ സമ്മർദമാണ് കാരണമെന്നും കോൺഗ്രസ്​ നേതാക്കൾ കുറ്റപ്പെടുത്തി. മൂന്നാറിലെ പെമ്പിളൈ ഒരുമൈ നേതാവിനെയും എൻജിനീയറിങ്​ കോളജിലെ വനിത പ്രിൻസിപ്പലിനെയും മോശമായി പരാമർശിച്ചത് എം.എം. മണിയാണെന്നും അവർ പറഞ്ഞു. കോൺഗ്രസ് ബൈസൺവാലി മണ്ഡലം പ്രസിഡന്റ് അലോഷി തിരുതാളി, ഒ.ബി.സി കോൺഗ്രസ് സംസ്ഥാന ജനറൽ സെക്രട്ടറി എം.ആർ. പ്രകാശ്, ഡി.സി.സി അംഗം തോമസ് നിരവത്ത് എന്നിവർ വാർത്ത സമ്മേളനത്തിൽ പങ്കെടുത്തു.