ആനത്തേറ്റ കടത്ത്​ മുഖ്യപ്രതി കീഴടങ്ങി

മൂന്നാര്‍: ആനത്തേറ്റയും മ്ലാവി‍ൻെറ കൊമ്പും കടത്തിയ കേസിലെ മുഖ്യപ്രതി ദേവികുളം കോടതിയിൽ കീഴടങ്ങി. ദേവികുളം കോളനിയിൽ താമസിക്കുന്ന ബാബുവാണ്​ (35) കീഴടങ്ങിയത്. പ്രതിയെ ദേവികുളം കോടതി റിമാൻഡ് ചെയ്ത് പീരുമേട് സബ് ജയിലിലേക്ക് അയച്ചു. ചൊവ്വാഴ്ച് രാവിലെയാണ് ഇയാൾ ദേവികുളം കോടതിയിൽ കീഴടങ്ങിയത്. ഈ മാസം 17നാണ് ആറ് കിലോ ആനത്തേറ്റയും മാൻകൊമ്പുമായി മൂന്നുപേര്‍ വനംവകുപ്പി‍ൻെറ പിടിയിലായത്. രഹസ്യവിവരത്തെ തുടര്‍ന്ന് വനംവകുപ്പി‍ൻെറ മൂന്നാര്‍ ഫ്ലയിങ്​ സ്‌ക്വാഡ് നടത്തിയ പരിശോധനയിലാണ് പ്രതികള്‍ പിടിയിലായത്. കെ.ഡി.എച്ച്.പി ചൊക്കനാട് എസ്റ്റേറ്റ് കൊളമാങ്ക ഡിവിഷന്‍ സ്വദേശികളായ നവരാജ് (41), പ്രേംകുമാര്‍ (43), ദേവികുളം കോളനി സ്വദേശിയായ പാണ്ടിത്തുരൈ (36) എന്നിവരാണ് പിടിയിലായത്. 17ന് ഉച്ചക്ക്​ രണ്ടുമണിയോടെ മൂന്നാര്‍ - ദേവികുളം റോഡില്‍ മൂന്നാര്‍ ഗവ. കോളജിനു സമീപത്തുവെച്ചാണ് ഇവരെ പിടികൂടിയത്. ഓട്ടോയില്‍ വിൽപനക്കാർക്ക് എത്തിക്കാനുള്ള ശ്രമത്തിനിടയിലാണ് പിടിയിലായത്. പിടിച്ചെടുത്ത നാല്​ ആനത്തേറ്റകള്‍ക്ക് ആറു കിലോയോളം ഭാരംവരും. ദേവികുളം റേഞ്ച് ഓഫിസര്‍ അരുണ്‍ മഹാരാജി‍ൻെറ നേതൃത്വത്തിലായിരുന്നു അറസ്റ്റ്. ഇവർ നൽകിയ മൊഴിയുടെ അടിസ്ഥാനത്തിലാണ് ബാബുവിനെ പ്രധാന പ്രതിയാക്കി വനംവകുപ്പ് കേസെടുത്തത്. ബാബുവിനെ കസ്റ്റഡിയിൽ ലഭിക്കാൻ വനംവകുപ്പ് അപേക്ഷ നൽകുമെന്ന് ദേവികുളം റേഞ്ച് ഓഫിസർ പറഞ്ഞു.