ജലാശയങ്ങളിൽ മാലിന്യം; നടപടിയുമായി പഞ്ചായത്ത്

അടിമാലി: മാലിന്യം നിക്ഷേപിക്കുന്നതിനും ദേവിയാർ മലിനീകരണത്തിനും എതിരെ കർശന നടപടിയുമായി അടിമാലി ഗ്രാമപഞ്ചായത്ത്. ലൈബ്രറി റോഡിൽ മലിനജലം ഒഴുക്കിയ രണ്ട് കെട്ടിട ഉടമകൾക്ക് 4500 രൂപ പിഴ ചുമത്തി. മലിന ജലം തോട്ടിലേക്ക്​ ഒഴുക്കുന്ന ഹോട്ടലുകൾ ഉൾപ്പെടെ ടൗണിലെ 14 സ്ഥാപനങ്ങൾക്ക് പിഴ ചുമത്തുകയും പ്രശ്നങ്ങൾ പരിഹരിക്കാൻ നോട്ടീസ് നൽകുകയും ചെയ്തു. ഒരു സ്ഥാപനം 5000 രൂപ പിഴ അടച്ചു. കല്ലാർകുട്ടി റോഡിൽ പ്രവർത്തിക്കുന്ന വർക്​ഷോപ്പിന് പുറകിൽ പ്ലാസ്റ്റിക് ഉൾപ്പെടെ മാലിന്യം കത്തിച്ച സ്ഥാപനത്തിൽനിന്ന്​ 5000 രൂപ പിഴ ഈടാക്കി. തോടുകളിലേക്കും പൊതു സ്ഥലങ്ങളിലേക്കും മാലിന്യം വലിച്ചെറിയുന്നവർക്കെതിരെ കർശന നടപടി സ്വീകരിക്കുമെന്ന് പ്രസിഡന്‍റ്​ ഷേർളി മാത്യു, സെക്രട്ടറി സതീഷ് എന്നിവർ അറിയിച്ചു.