റോഡ്​ കൈ​യേറ്റം ഒഴിപ്പിക്കൽ വൈകുന്നു

അടിമാലി: മേജർ ഡിസ്ട്രിക്ട്​ റോഡായി നിർമാണം പൂർത്തിയാക്കിയ രാജാക്കാട്-എല്ലക്കൽ റോഡിന്‍റെ ഇരുവശങ്ങളിലും കൈയേറിയ സ്ഥലം തിരിച്ചെടുക്കുന്ന നടപടി വൈകുന്നതായി ആക്ഷേപം. പൊതുമരാമത്ത് വകുപ്പ് നിർമിച്ച റോഡി​ന്‍റെ പല ഭാഗങ്ങളിലും കൈയേറ്റമുണ്ട്. ചിലർ റോഡി​ന്‍റെ സ്ഥലം കൈയേറി കെട്ടിടത്തിന് ​ചാർത്തുകൾ നിർമിച്ചിട്ടുണ്ട്​. 15 മീറ്ററാണ് ഏറ്റെടുത്ത റോഡിന്‍റെ വീതി. എന്നാൽ, പലഭാഗത്തും 10 മീറ്റർ പോലും ഇല്ല. ഗ്യാപ് ചെമ്മണ്ണാർ റോഡിന്‍റെ ഭാഗമായി രാജാക്കാട് മുതൽ മുല്ലക്കാനം വരെയുള്ള ഭാഗവും ഇതിൽപ്പെടുന്നതാണ്. കെ.എസ്.ടി.പിയുടെ മേൽനോട്ടത്തിൽ റോഡ്​ നിർമാണം ദ്രുതഗതിയിൽ നടക്കുകയാണ്. കൈയേറിയ സ്ഥലം വിട്ടുകിട്ടാത്തതിനാലാണ് പല ഇടങ്ങളിലും വീതികൂട്ടൽ നടക്കാത്തത്. സർക്കാർ ഹോമിയോ ക്ലിനിക്കിന് എതിർവശത്തുള്ള കുരങ്ങുപാറ റോഡ് തിരിയുന്ന കവലയിലും പഴയ പോസ്​റ്റ്​ ഓഫിസിന് സമീപം മന്നാക്കുടി റോഡിലേക്ക് തിരിയുന്ന ജങ്​ഷനിലും മുല്ലക്കാനത്ത് ആനപ്പാറക്ക്​ തിരിയുന്ന ജങ്​ഷനിലും വീതികൂട്ടാൻ കൂടുതൽ സ്ഥലം ആവശ്യമുണ്ട്. ഇത്​ പഞ്ചായത്ത് ഏറ്റെടുത്ത് നൽകണമെന്നാണ് വ്യവസ്ഥയെങ്കിലും പാലിക്ക​പ്പെട്ടിട്ടില്ല. പഴയ പോസ്​റ്റ്​ ഓഫിസിന് സമീപം അഞ്ച് പതിറ്റാണ്ടോളം പഴക്കമുള്ളതും വീതികുറഞ്ഞതുമായ കലുങ്ക് നിലനിർത്തിയാണ് റോഡ് നിർമാണം. ഇവിടം വീതികൂട്ടി പുതിയ കലുങ്ക് നിർമിച്ചില്ലെങ്കിൽ വലിയ വെള്ളക്കെട്ടുണ്ടാകും. ബലക്ഷയത്തിനും സാധ്യതയുണ്ട്. പഞ്ചായത്തും പൊതുമരാമത്ത് വകുപ്പും ഇടപെട്ട് പ്രശ്നത്തിന് ശ്വാശ്വത പരിഹാരം ഉണ്ടാക്കണമെന്നാണ് ആവശ്യം.