അതിർത്തി വനമേഖലയിൽ അജ്ഞാത സംഘമെന്ന്​ പരാതി

നെടുങ്കണ്ടം: അതിര്‍ത്തി വനമേഖലയില്‍ അജ്ഞാത സംഘം ക്യാമ്പ് ചെയ്യുന്നതും അണക്കരമെട്ടില്‍ ദേഹമാസകലം കരിഓയില്‍ പൂശിയ രണ്ടുപേരെ കണ്ടതും അതിര്‍ത്തി പട്ടണത്തിലെ കുടുംബങ്ങളുടെ ഉറക്കം കെടുത്തുന്നു. വനാതിര്‍ത്തിയില്‍ സ്ഥാപിച്ച ഷെഡുകളില്‍ രാത്രി ഭക്ഷണം പാചകം ചെയ്ത് കഴിക്കുന്നത് നാട്ടുകാരുടെ ശ്രദ്ധയിൽപെട്ടതും ആശങ്ക ഉയർത്തിയിട്ടുണ്ട്​. കഴിഞ്ഞ ദിവസം രാത്രി പത്തോടെ അണക്കരമെട്ടില്‍നിന്ന്​ തൂക്കുപാലത്തേക്ക് പോയ ജീപ്പ് ഡ്രൈവറാണ് ശരീരം മുഴുവൻ കരിഓയില്‍ തേച്ച രണ്ടുപേരെ കണ്ടത്. ജീപ്പ് ഡ്രൈവറെ കണ്ടതോടെ ഇരുവരും സമീപത്തെ ഏലക്കാട്ടിലേക്ക് ഓടിമറഞ്ഞു. പ്രദേശവാസികള്‍ മേഖലയില്‍ തിരച്ചില്‍ നടത്തിയെങ്കിലും കണ്ടെത്താനായില്ല. ഇവര്‍ തമിഴ്‌നാട് വനത്തില്‍നിന്ന്​ കയറി വന്നതായാണ് സംശയം. നെടുങ്കണ്ടം പൊലീസും തമിഴ്‌നാട് വനംവകുപ്പും സംയുക്തമായി പ്രദേശത്ത് പരിശോധന നടത്തിയെങ്കിലും ആരെയും കണ്ടെത്താനായില്ല. തമിഴ്‌നാട്ടില്‍നിന്നുള്ള കഞ്ചാവ് കടത്തുകാരാണെന്ന സംശയത്തിലാണ് പൊലീസ്​.