മീഡിയവൺ വിലക്ക്: പ്രതിഷേധം

തൊടുപുഴ: 'മീഡിയവൺ' ചാനലിന്‍റെ സംപ്രേഷണം വിലക്കിയ കേന്ദ്രസർക്കാർ നടപടി മാധ്യമ സ്വാതന്ത്ര്യത്തിന്‍റെ നിഷേധം എന്ന മാനത്തിനുമപ്പുറം ജനാധിപത്യ വ്യവസ്ഥയുടെ അടിസ്ഥാന പ്രമാണങ്ങളുടെ ലംഘനമാണെന്ന് എസ്​.യു.സി.ഐ (കമ്യൂണിസ്റ്റ്) ജില്ല കമ്മിറ്റി അഭിപ്രായപ്പെട്ടു. സുരക്ഷാകാരണങ്ങൾ മുൻനിർത്തിയ വിലക്കെന്ന്​ മാത്രമേ കേന്ദ്ര വാർത്താവിതരണ മന്ത്രാലയം നൽകിയ ഉത്തരവിൽ പറയുന്നുള്ളൂ. തങ്ങൾക്ക് ഹിതകരമല്ലാത്ത നിലപാട് സ്വീകരിക്കുന്ന ഏതൊരു മാധ്യമത്തെയും, പ്രത്യേകിച്ച് ഒരു കാരണവും ചൂണ്ടിക്കാട്ടാതെ തടയാമെന്നൊരു കീഴ്​വഴക്കമുണ്ടാകുന്നത് അംഗീകരിക്കാനാവില്ലെന്നും ഇത് ഭരണാധികാരികളുടെ ഫാഷിസ്റ്റ് സമീപനത്തിന്‍റെ ഭാഗമാണെന്നും യോഗം വിലയിരുത്തി. മീഡിയവണിനെതിരായ വിലക്ക് ഉടൻ പിൻവലിക്കണം. സിബി സി. മാത്യു അധ്യക്ഷത വഹിച്ചു. എൻ. വിനോദ്കുമാർ, കെ.എൽ. ഈപ്പച്ചൻ, പി.ടി. വർഗീസ്​, എം.ബി. രാജശേഖരൻ എന്നിവർ സംസാരിച്ചു. ബസ്​സ്​റ്റോപ്​ മാറ്റണം കരിമണ്ണൂർ: ഫൊറോന പള്ളിയുടെ ഭണ്ഡാരത്തിന്​ മുന്നിലെ ബസ്​സ്റ്റോപ് തൊട്ടടുത്ത കരിമണ്ണൂർ പഞ്ചായത്തിന്‍റെ വെയ്റ്റിങ് ഷെഡിന് സമീപത്തേക്ക് മാറ്റണമെന്ന്​ ആവശ്യപ്പെട്ട്​ ഗ്രാമപഞ്ചായത്ത് പ്രസിഡൻറിന്​ കരിമണ്ണൂർ റിവർ വ്യൂ റെസിഡന്‍റ്​സ് അസോസിയേഷൻ പ്രസിഡന്‍റ്​ ജോയി ഇളബ്ലാശ്ശേരിയിൽ നിവേദനം നൽകി. ബസ്​സ്​റ്റോപ്​ കിളിയറ റോഡിലൂടെ കരിമണ്ണൂർ ടൗണിലേക്ക് വരുന്ന വാഹനങ്ങൾക്ക് തടസ്സം സൃഷ്ടിക്കുന്നതായും നിരവധി അപകടങ്ങൾ ഉണ്ടാക്കുന്നതായും നിവേദനത്തിൽ ചൂണ്ടിക്കാട്ടി. ഭാരവാഹികളായ അഗസ്റ്റിൻ വരിക്കാശ്ശേരി, ലംബൈ കുമ്പിളിമൂട്ടിൽ, ഏബേൽ ജയിംസ് എന്നിവരും പ​ങ്കെടുത്തു.