കാലാവധി കഴിഞ്ഞിട്ടും പ്രസിഡന്‍റ്​ മാറിയില്ല: കുടയത്തൂരിൽ കോൺഗ്രസ്​ അവിശ്വാസത്തിന്

രാജിവെക്കുന്നത് സംബന്ധിച്ച് ചർച്ച നടക്കുന്നതായി കേരള കോൺഗ്രസ് ജില്ല പ്രസിഡൻറ് എം.ജെ. ജേക്കബ് കാഞ്ഞാർ: കാലാവധി പൂർത്തിയായിട്ടും കുടയത്തൂർ പഞ്ചായത്തു പ്രസിഡൻറ്​ രാജിവെക്കാത്തത്തിൽ യു.ഡി.എഫിൽ കടുത്ത ഭിന്നത. മുന്നണിയിലെ ധാരണപ്രകാരമുള്ള കാലാവധിയായ ഒരുവർഷം കഴിഞ്ഞിട്ടും കേരള കോൺഗ്രസ് അംഗമായ പ്രസിഡന്‍റ്​ ഉഷ വിജയൻ രാജിവെക്കാൻ തയാറാകുന്നില്ല. പ്രസിഡന്‍റ്​ സ്ഥാനം ആദ്യ ഒരുവർഷം കേരള കോൺഗ്രസിനും തുടർന്നു നാലുവർഷം കോൺഗ്രസിനും എന്നായിരുന്നു ധാരണ. 2020 ഡിസംബർ 30നാണ് ഭരണസമിതി അധികാരമേറ്റത്. കഴിഞ്ഞ ഡിസംബറിൽ ധാരണപ്രകാരം ഒരുവർഷം പൂർത്തിയായെങ്കിലും ഒരുമാസം കൂടി സാവകാശം ചോദിച്ച് വാങ്ങിയിരുന്നു. ആ കാലവധിയും തിങ്കളാഴ്ച അവസാനിച്ചെങ്കിലും രാജിവെച്ചിട്ടില്ല. കക്ഷിനില: യു.ഡി.എഫ്- കോൺഗ്രസ് നാല്​, മുസ്​ലിം ലീഗ് ഒന്ന്​, കേരള കോൺഗ്രസ് ഒന്ന്​. എൽ.ഡി.എഫിന് അഞ്ചും ബി.ജെ.പിക്ക് രണ്ടും അംഗങ്ങളുണ്ട്​. പ്രസിഡന്‍റും യു.ഡി.എഫിലെ മറ്റ് അംഗങ്ങളുമായി അഭിപ്രായ വ്യത്യാസങ്ങളുണ്ട്. പ്രസിഡന്‍റ്​ ഇടതുപക്ഷത്തിന് ഒപ്പമാണെന്ന ആക്ഷേപം യു.ഡി.എഫ് അംഗങ്ങൾക്കിടയിൽ തന്നെയുണ്ട്. പ്രതിസന്ധി കടുത്താൽ പ്രസിഡന്‍റിനെതിരെ യു.ഡി.എഫ് അവിശ്വാസം കൊണ്ടുവരുമെന്ന് ഉറപ്പാണ്. ബി.ജെ.പി, യു.ഡി.എഫിന് ഒപ്പംനിന്നാൽ അവിശ്വാസം പാസാവുകയും പ്രസിഡന്‍റ്​ പദവിയിൽനിന്ന് ഉഷ വിജയൻ പുറത്താവുകയും ചെയ്യും. കഴിഞ്ഞ ദിവസം വാത്തിക്കുടി പഞ്ചായത്തിൽ കേരള കോൺഗ്രസ് പ്രസിഡന്‍റ്​ ധാരണ പാലിക്കാതെ ഇടതുപക്ഷത്തിന് ഒപ്പം ചേർന്നിരുന്നു. ഇതേ അവസ്ഥ കുടയത്തൂരിലും ഉണ്ടാവുമൊ എന്ന്​ സംശയം ഉയർന്നിട്ടുണ്ട്​. ജനുവരി 31ന് പ്രസിഡന്‍റ്​ രാജിവെക്കുമെന്ന് കേരള കോൺഗ്രസ് നേതൃത്വം പറഞ്ഞിരുന്നു. നടപടി നീളുന്ന പക്ഷം അവിശ്വാസ പ്രമേയം ഉൾപ്പെടെ കടുത്ത നടപടികളിലേക്ക്​ നീങ്ങുമെന്ന് കോൺഗ്രസ് മണ്ഡലം പ്രസിഡന്‍റ്​ ഫ്രാൻസിസ് പറഞ്ഞു. രാജിവെക്കുന്നത് സംബന്ധിച്ച് ചർച്ച നടക്കുന്നതായി കേരള കോൺഗ്രസ് ജില്ല പ്രസിഡൻറ് എം.ജെ. ജേക്കബ് പറഞ്ഞു.