ഏലപ്പാറ പി.എച്ച്.സിയിൽ ഡോക്ടർമാർ കുറവ്​

അധികൃതർ അറിയാൻ ഏലപ്പാറ: ഏലപ്പാറ പ്രാഥമികാരോഗ്യ കേന്ദ്രത്തിൽ ഡോക്ടർമാരുടെ അഭാവം ആശുപത്രിയിലെത്തുന്ന രോഗികൾക്ക്​ ദുരിതമാകുന്നു. രണ്ട് ഡോക്ടർമാരുടെ സേവനം ലഭ്യമായിരുന്ന ആശുപത്രിയിൽ ഒരു ഡോക്ടർ മാത്രമാണുള്ളത്. ഒരാൾ സ്ഥലം മാറിപ്പോയശേഷം പകരം നിയമനം നടത്തിയിട്ടില്ല. തോട്ടം തൊഴിലാളികൾ ഉൾപ്പെടെ നൂറുകണക്കിന് സാധാരണക്കാരുടെ ആശ്രയമാണ് ഈ ആശുപത്രി. കോവിഡ് ഒമിക്രോൺ വൈറസിന്റെ വ്യാപനം രൂക്ഷമായ സാഹചര്യത്തിൽ ഡോക്​ടറുടെ അഭാവം ആശുപത്രിയുടെ പ്രവർത്തനങ്ങ​ളെ പ്രതിസന്ധിയിലാക്കുന്നു. നിലവിലുളള ഡോക്ടർ അവധിയിലാകുകയോ ഔദ്യോഗിക ആവശ്യങ്ങൾക്ക് പങ്കെടുക്കുകയോ ചെയ്യുന്ന ദിവസങ്ങളിൽ ചികിത്സ ലഭ്യമല്ല. ഹെലിബേറിയ, കോട്ടമല, വാഗമൺ പ്രദേശങ്ങളിൽനിന്ന്​ കിലോമീറ്ററുകൾ താണ്ടി ചികിത്സ​ക്കെത്തുന്ന രോഗികളെ ഡോക്ടർ ഇല്ലെന്ന പേരിൽ ആശുപത്രി ജീവനക്കാർ മടക്കി അയക്കുന്നതും പതിവാണ്. ലാബ് സൗകര്യങ്ങൾ പ്രവത്തിക്കാത്തതിനാൽ സമീപ സ്വകാര്യ ലാബുകളെ ആശ്രയിക്കേണ്ടിവരുന്നു. രണ്ട് ഫാർമസിസ്​റ്റ്​ തസ്തിക ഉണ്ടെങ്കിലും ഒരാൾ മാത്രമാണുള്ളത്.