ജില്ലക്ക്​ അരനൂറ്റാണ്ട്​ തികഞ്ഞിട്ടും യാഥാർഥ്യമാകാതെ പ്രഖ്യാപനങ്ങൾ

ഇടുക്കി-ഉടുമ്പന്നൂർ റോഡ്​ ഇപ്പോഴും പൂർത്തിയാകാതെ കിടക്കുന്നു ചെറുതോണി: അരനൂറ്റാണ്ട്​ പിന്നിട്ട ജില്ല ആസ്ഥാനത്ത് നിറവേറാത്ത വാഗ്ദാനങ്ങൾ നിരവധി. മാറി മാറി വന്ന സർക്കാറുകൾ നൽകിയ വാഗ്ദാനമാണ് ഇടുക്കിയിൽ മിനി സിവിൽ സ്റ്റേഷൻ. ഡെന്‍റൽ കോളജ് അനുവദിക്കുമെന്ന്​ പ്രഖ്യാപിച്ചത്​ കരുണാകരൻ മുഖ്യമന്ത്രിയായിരുന്നപ്പോഴാണ്​. പത്തുചെയിൻ, പെരിഞ്ചാംകുട്ടി പ്രദേശങ്ങളിലുള്ളവർക്ക്​ ഇന്നും പട്ടയം കിട്ടിയിട്ടില്ല. പെരിഞ്ചാംകുട്ടി പദ്ധതി സർക്കാർ ഉപേക്ഷിച്ചിട്ട് വർഷങ്ങളായിട്ടും ആ പ്രദേശത്ത്​ താമസിക്കുന്നവർക്ക്​ പട്ടയം വാഗ്ദാനത്തിലൊതുങ്ങി. ജില്ല ആസ്ഥാനത്ത് സായി സ്​പോർട്സ് സൻെറർ വാഗ്ദാനം ചെയ്​തെങ്കിലും അതും നടപ്പായില്ല. ഇടുക്കിയിൽ സൈക്കിൾ വെലോഡ്രോം ജോസ് കുറ്റിയാനി എം.എൽ.എയായിരുന്ന കാലത്ത് പ്രഖ്യാപിച്ചതാണ്, ഇന്നും യാഥാർഥ്യമായിട്ടില്ല. വികസനത്തിന്‍റെ നാഴികക്കല്ലായി വിശേഷിപ്പിച്ച ഇടുക്കി-ഉടുമ്പന്നൂർ റോഡ്​ ഇപ്പോഴും പൂർത്തിയാകാതെ കിടക്കുന്നു. ഇടുക്കിയിൽ പ്രഖ്യാപിച്ച 40 കോടിയുടെ ബസ് ടെർമിനൽ എവിടെ എന്ന ചോദ്യത്തിനും അധികൃതർക്ക്​ ഉത്തരമില്ല. ചെറുതോണി പൊലീസ് സ്‌റ്റേഷനു സമീപം പണിയാരംഭിച്ച ബസ് സ്റ്റാൻഡ് ഇപ്പോൾ ബ്രേക്ക്​​ ഡൗണിലാണ്​. ചെറുതോണിയിൽ നിർമിക്കുമെന്ന്​ പ്രഖ്യാപിച്ച ബട്ടർഫ്ലൈ പാലത്തിന്‍റെ ജോലികളും ഇഴയുന്നു. കുളമാവ് ഹൈഡൽ ടൂറിസം പദ്ധതിക്ക് ഉമ്മൻ ചാണ്ടി സർക്കാർ ഒരു കോടി രൂപ അനുവദിച്ചിരുന്നു. എന്നാൽ, പദ്ധതിയെക്കുറിച്ച്​ ഇപ്പോൾ ആർക്കുമറിയില്ല. ചെറുതോണിയിൽ കെ.എസ്.ആർ.ടി.സി.സി ഡിപ്പോ ആരംഭിക്കുമെന്ന് 20 വർഷം മുമ്പുള്ള വാഗ്ദാനമാണ്. ഇതിന്​ അന്ന്​ ഇടുക്കി ആലിൻചുവടിന്​ സമീപം സ്ഥലം കണ്ടെത്തിയിരുന്നു. വാഗ്ദാനം പിന്നീട്​ ജലരേഖയായി. ഇടുക്കിയിലും കൊന്നത്തടിയിലും അന്താരാഷ്ട്ര സ്​റ്റേഡിയം, കരിമ്പനിൽ സ്‌റ്റേഷനറി ഡിപ്പോയുടെ ജില്ലതല ഓഫിസ്, വണ്ണപ്പുറം-ചേലച്ചുവട്-ചെറുതോണി സമാന്തര ഹൈവേ, ഇടുക്കി താലൂക്ക് എംപ്ലോയ്‌മെന്‍റ്​ എക്സ്​ചേഞ്ച് എന്നിവയും പ്രഖ്യാപനത്തിന്​ ശേഷം വിസ്മൃതിയിലായി. ഇടുക്കി, കഞ്ഞിക്കുഴി, തങ്കമണി പഞ്ചായത്തുകളിലായി ഇനിയും പട്ടയം കിട്ടാത്ത കർഷകർ ഏറെയാണ്​. പെരിഞ്ചാംകുട്ടിയിൽനിന്ന് കുടിയിറക്കപ്പെട്ട ആദിവാസികൾ സ്ഥലം കിട്ടുമെന്ന വാഗ്ദാനം വിശ്വസിച്ച്​ കഴിയുന്നു. 50 വർഷം പൂർത്തിയാക്കിയ മലയോര ജില്ലയിലെ ജനം അധികൃതർ പതിറ്റാണ്ടുകൾ നൽകിയ വാഗ്ദാനങ്ങൾ നിറവേറുമെന്ന പ്രതീക്ഷയിലാണ്​ ഇപ്പോഴും.