പട്ടം കോളനി ​മേഖലയിൽ കോവിഡ്​ ബാധിതരുടെ എണ്ണം കൂടുന്നു

നെടുങ്കണ്ടം: പട്ടം കോളനി മേഖലയില്‍ കോവിഡ് ബാധിതരുടെ എണ്ണം നാള്‍ക്കുനാള്‍ കുതിക്കുന്നു. നെടുങ്കണ്ടം, കരുണാപുരം പഞ്ചായത്തുകളിലാണ്​ രോഗികൾ വർധിക്കുന്നത്​. ഔദ്യോഗിക കണക്കുപ്രകാരം ഈ മാസം ശനിയാഴ്ച വരെ നെടുങ്കണ്ടം പഞ്ചായത്തില്‍ 484 പേര്‍ക്ക് പോസിറ്റിവായി. ഇതില്‍ പകുതിയിലേറെപ്പേരും ഇപ്പോഴും ചികിത്സയിലാണ്. 400 പേരോളം വീടുകളില്‍ നിരീക്ഷണത്തിലാണ്. പട്ടം കോളനി മേഖലയില്‍ മാത്രം ഈ മാസം കോവിഡ് സ്ഥിരീകരിച്ചത്​ 900ലധികം ആളുകള്‍ക്കാണ്. എന്നാല്‍, ഇതിന്റെ ഇരട്ടി രോഗികളുള്ളതായാണ് അനൗദ്യോഗിക കണക്ക്. നെടുങ്കണ്ടം, തൂക്കുപാലം, രാമക്കല്‍മേട് മേഖലയിലും രോഗികളുടെ എണ്ണം വര്‍ധിച്ചു. നിലവില്‍ ടൗണിലും പരിസര പ്രദേശങ്ങളിലെങ്ങും ഒരു സുരക്ഷാമാനദണ്ഡങ്ങളുമില്ല. മുമ്പ് പഞ്ചായത്ത് ടൗണില്‍ സ്ഥാപിച്ചിരുന്ന സാനിറ്റൈസര്‍ ബൂത്തുകളും കാര്യക്ഷമമായി പ്രവര്‍ത്തിക്കുന്നില്ല.