റദ്ദാക്കിയ പട്ടയങ്ങൾക്ക് പകരം സാധുവായത്​ നൽകണം –യു.ഡി.എഫ്

തൊടുപുഴ: വിവാദ രവീന്ദ്രൻ പട്ടയങ്ങൾ റദ്ദാക്കിയതിന്‍റെ മറവിൽ ആരെയും ബലമായി ഒഴിപ്പിക്കരുതെന്ന്​ യു.ഡി.എഫ് ജില്ല ചെയർമാൻ എസ്​. അശോകനും കൺവീനർ എം.ജെ. ജേക്കബും ആവശ്യപ്പെട്ടു. സർക്കാറുകളുടെ കാലത്ത്​ വിവാദ പട്ടയങ്ങൾ അംഗീകരിച്ച് പോക്കുവരവ്​ ചെയ്​ത്​ കൊടുത്ത വസ്​തുക്കൾ പലതും ഇതിനകം കൈമാറിയിട്ടുണ്ട്. കൈമാറി കൈമാറിക്കിട്ടിയവരുടെ കൈവശാനുഭവത്തിലാണ് പട്ടയങ്ങളിൽ ഉൾപ്പെട്ട മഹാഭൂരിപക്ഷം വസ്​തുക്കളും. ഈ ഭൂമികളിലൊക്കെ സർക്കാറിന്‍റെ അറിവോടെ ഒരുപാട് നിർമാണ പ്രവർത്തനങ്ങൾ നടന്നിട്ടുണ്ട്. രവീന്ദ്രൻ പട്ടയങ്ങൾ റദ്ദാക്കിയതിന്‍റെ​ മറവിൽ അവരെയെല്ലാം ഒഴിപ്പിക്കുന്നത് ന്യായീകരിക്കാനാവില്ല. ഉത്തരവിന്‍റെ മറവിൽ കർഷകരെ ​ദ്രോഹിച്ചാൽ യു.ഡി.എഫ്​ അവർക്ക്​ എല്ലാ സംരക്ഷണവും നൽകുമെന്നും നേതാക്കൾ പറഞ്ഞു. സി.പി.എം കർഷകരുടെ പേരിൽ മുതലക്കണ്ണീരൊഴുക്കുന്നത് ശുദ്ധതട്ടിപ്പാണ്. റദ്ദാക്കപ്പെട്ട പട്ടയങ്ങൾക്ക് പകരം സാധുവായ പട്ടയങ്ങൾ അർഹതപ്പെട്ടവർക്കെല്ലാം നൽകണമെന്നും അനാവശ്യമായ സാങ്കേതിക തടസ്സങ്ങൾ ഉയർത്തി കാലവിളംബം ഉണ്ടാക്കരുതെന്നും യു.ഡി.എഫ് നേതാക്കൾ ആവശ്യപ്പെട്ടു.