സ്കൂളിലെ വഴക്ക്​ തീർക്കാനെത്തിയ രക്ഷിതാവ്​ വിദ്യാർഥിയെ മർദി​ച്ചു

കാഞ്ഞാർ: കൂവപ്പള്ളി സി.എം.എസ് ഹൈസ്‌കൂളിൽ കുട്ടികൾ തമ്മിലുണ്ടായ വഴക്ക്​ പറഞ്ഞുതീർക്കാനെത്തിയ രക്ഷിതാവ്​ വിദ്യാർഥിയെ മർദിച്ചതായി പരാതി. രക്ഷിതാവായ ചക്കിക്കാവ് പുലിക്കള്ളിൽ സന്ധ്യ ഷൈജു ക്ലാസിൽ കയറി വിദ്യാർഥിയെ മർദിച്ചെന്നാണ്​ പരാതി. കഴിഞ്ഞ ദിവസം വിദ്യാർഥികൾ തമ്മിലുണ്ടായ വാക്കേറ്റം പറഞ്ഞുതീർക്കാൻ രക്ഷിതാക്കളെ ബുധനാഴ്ചയാണ്​ സ്‌കൂളിൽ വിളിച്ചുവരുത്തിയത്​. പട്ടികവർഗ ഹോസ്റ്റലിൽ താമസിക്കുന്ന വിദ്യാർഥിക്കുവേണ്ടി ഹോസ്റ്റൽ വാർഡനും മറ്റൊരു വിദ്യാർഥിക്കു​വേണ്ടി കൂവപ്പള്ളി സ്വദേശിയായ മാതാവുമാണ് രാവിലെ 11ഓടെ എത്തിയത്. സ്‌കൂളിൽ എത്തിയ മാതാവ് ക്ലാസ് മുറിയിലെത്തി ഹോസ്റ്റലിലെ വിദ്യാർഥിയെ മർദിക്കുകയായിരുന്നു. തടസ്സംപിടിക്കാനെത്തിയ സ്‌കൂൾ ജീവനക്കാരനും മർദനമേറ്റു. പരിക്കേറ്റ വിദ്യാർഥിയെ അറക്കുളം പ്രാഥമികാരോഗ്യ കേന്ദ്രത്തിലേക്കും തുടർന്ന്​ തൊടുപുഴ ജില്ല ആശുപത്രിയിലേക്കും മാറ്റി. ഹെഡ്മിസ്ട്രസ് ഇടപെട്ടാണ് കുട്ടിയുടെ മാതാവിനെ സ്‌കൂളിൽനിന്ന്​ പുറത്തേക്കയച്ചത്. രേഖാമൂലം പരാതി കിട്ടാത്തതുകൊണ്ട് കേസെടുത്തി​ല്ലെന്ന് സ്ഥലത്തെത്തിയ കാഞ്ഞാർ എസ്‌.ഐ കെ.ഐ. നസീർ പറഞ്ഞു.