വിള ഇൻഷുറൻസിനായി​ കാത്തിരിപ്പ്​

അടിമാലി: വിള ഇൻഷുറൻസ് തുക ലഭിക്കാൻ കാലതാമസമെന്ന് കർഷകരുടെ പരാതി. 2019ൽ കൃഷിനാശം സംഭവിച്ച കർഷകരാണ് ക്ലെയിം തുക ഇതുവരെ ലഭിച്ചില്ലെന്ന പരാതി ഉയർത്തുന്നത്. ഏറെ കൊട്ടിഗ്​ഘോഷിച്ച് സർക്കാർ നടപ്പാക്കിയതാണ്​ വിള ഇൻഷുറൻസ്. ഇൻഷുർ ചെയ്യുന്ന വിള നശിച്ചാൽ കർഷകന് നഷ്ടപരിഹാരം ലഭിക്കുമെന്ന്​ പറഞ്ഞാണ് കൃഷി ഓഫിസർമാർ ആളെ ചേർത്തത്. കൃഷി ചെയ്യുന്ന തോട്ടത്തിലെ വിള ഏതോ, അത് മുഴുവനായി ഇൻഷുർ ചെയ്യണമെന്നതാണ് വ്യവസ്ഥ. കൃഷിനാശം സംഭവിച്ചാൽ കൃഷി ഓഫിസർ വന്ന് പരിശോധിച്ച് നൽകുന്ന റിപ്പോർട്ടിന്‍റെ അടിസ്ഥാനത്തിൽ നഷ്ടപരിഹാരം ലഭിക്കുമെന്നായിരുന്നു അറിയിപ്പ്​. ഇതനുസരിച്ച് പല കർഷകരും പദ്ധതിയിൽ ചേരുകയും കൃഷിനാശം ഓഫിസറെ നേരിട്ട്​ ബോധ്യപ്പെടുത്തുകയും ചെയ്തിരുന്നു. കൃഷി ഓഫിസർ റിപ്പോർട്ട് നൽകി വർഷം രണ്ടുകഴിഞ്ഞിട്ടും ധനസഹായം ലഭിച്ചിട്ടില്ലെന്നാണ് പരാതി. തുക ലഭിക്കാത്തതിനെക്കുറിച്ച്​ കൃഷി ഓഫിസിൽ അന്വേഷിക്കുമ്പോൾ ഉടൻ ലഭിക്കുമെന്ന്​ മാത്രമാണ്​ മറുപടിയെന്ന് കർഷകർ പറയുന്നു. രാജാക്കാട് മേഖലയിലെ നിരവധി ഏത്തവാഴ കർഷകർക്കാണ് ഇങ്ങനെ ഇൻഷുർ തുക ലഭിക്കാനുള്ളത്. പല കർഷകരും പാട്ടത്തിന് സ്ഥലമെടുത്തവരും പങ്ക് കൃഷി നടത്തുന്നവരുമാണ്.