മറക്കാനാവില്ല മലയോരം

എന്‍റെ ഇടുക്കി -കോളം കെ.പി. തോമസ്​ (കായിക പരിശീലകൻ) ഇടവേളകളിൽ സ്കൂളിൽ ബെല്ലടിക്കാൻ​ കാതോർത്തുനിൽക്കും. കിണറ്റിന്‍റെ കരയി​ലെത്തി ആദ്യം വെള്ളം കോരുന്നതിനുള്ള തൊട്ടി സ്വന്തമാക്കുകയായിരുന്നു ലക്ഷ്യം. മിക്കപ്പോഴും​ ഞാൻ തന്നെയായിരുന്നു ആദ്യം വെള്ളം കുടിക്കുന്നതും. ഇത്​ കണ്ട അധ്യാപകരാണ്​ നീ നല്ല ഓട്ടക്കാരനാണ​ല്ലോ എന്ന്​ അന്ന്​ ആദ്യമായി പറയുന്നത്​​. ഇതായിരുന്നു ആദ്യ അംഗീകാരം. വഴിത്തല മാറിക എൽ.പി സ്കൂൾ, പുറപ്പുഴ സെന്‍റ്​ ആൻറണീസ്​ സ്കൂളിലുമായിട്ടായിരുന്നു പഠനം. പഠിക്കുമ്പോൾ സ്കൂൾതല കായിക മത്സരങ്ങൾ ഇല്ലായിരുന്നു. എട്ടാംക്ലാസിൽ പഠിക്കു​മ്പോൾ കൊല്ലത്ത്​ ത്രീ സ്റ്റാർ മത്സരം എന്ന്​ വിളിച്ചിരുന്ന മത്സരത്തിൽ പ​​ങ്കെടുക്കാൻ പോയി. മൂന്ന്​ ഫസ്റ്റ്​ അന്ന്​ സ്വന്തമാക്കി. ആസമയത്താണ്​ പട്ടാള റിക്രൂട്ട്​മെന്‍റ്​ നടക്കുന്നത്​. അങ്ങനെ മിലിട്ടറിയിലെത്തി. മിലിട്ടറി സ്​പോർട്​സിൽ ഞാൻ മാത്രമായിരുന്നു​ മലയാളി. പട്ടാളത്തിൽനിന്ന്​ വന്ന്​ മലബാർ മേഖലയിൽ കായിക അധ്യാപകനായി ജോലിനോക്കി. പിന്നീട്​ ഏന്തയാർ മർഫി സ്കൂളിലും വണ്ണപ്പുറം സ്കൂളിലും ​കായിക അധ്യാപകനായി എത്തി. ഇടുക്കിയിൽ വണ്ണപ്പുറത്ത്​ 10​ വർഷമുണ്ടായിരുന്നു. കരിയറിലെ ഏറ്റവും മികച്ച സമയമായിരുന്നു അത്​. അന്തർ ദേശീയ താരങ്ങളെയടക്കം വാർത്തെടുക്കാൻ കഴിഞ്ഞത്​ ഈ കാലത്താണ്​​. വണ്ണപ്പുറത്ത്​ കുട്ടികളുമായി ചേർന്ന്​ കൃഷിയൊക്കെയുണ്ടായിരുന്നു. പരിശീലനത്തോടൊപ്പം അവർക്കുള്ള ഭക്ഷണവും കൃഷിയിലൂടെ ഉണ്ടാക്കിയിരുന്നു. അതൊന്നും മറക്കാൻ കഴിയുന്നതല്ല. കേരളത്തിൽ ഏറ്റവും കൂടുതൽ ഒളിമ്പ്യന്മാരുള്ളത്​ ഇടുക്കി ജില്ലയിൽനിന്നാണ്​. ​തനിക്ക്​ ദ്രോണാചാര്യ അവാർഡ്​ ലഭിച്ചതും ഇടുക്കിയിലുള്ളപ്പോഴാണ്​. ഇടുക്കിയി​ലിപ്പോഴും ബന്ധുക്കളും നിരവധി സുഹൃത്തുക്കളുമുണ്ട്​​. കുടുംബത്തിൽതന്നെ രണ്ട്​ അർജുന അവാർഡുകാരുണ്ട്​. ഷൈനി വിത്സൺ ജ്യേഷ്​ഠന്‍റെ മകളാണ്​. വഴിത്തലയിലാണ്​ തറവാട്​ വീട്​. ഇവിടെയാണ്​ ജനിച്ചത്​. പട്ടാളത്തിൽനിന്ന്​ അവധിക്ക്​ വരുമ്പോൾ ജ്യേഷ്ഠാനുജൻമാരുടെ കുട്ടികളെ ഓട്ട മത്സരത്തിൽ പ​ങ്കെടുപ്പിക്കുമായിരുന്നു​. മുന്നിലെത്തുന്നവർക്ക്​​ മിഠായിയായിരുന്നു വാഗ്ദാനം. പലപ്പോഴും ആദ്യം ഓടിയെത്തുന്നത്​ ഷൈനി തന്നെയായിരുന്നു. ഇപ്പോൾ കോരുത്തോട്ടിലെ​ സ്കൂളിലാണ്​ പരിശീലനം നൽകുന്നത്​. ഇടുക്കിയിൽ നാട്ടുകാരും കായിക രംഗത്തെ സ്​നേഹിക്കുന്നവുരുമായി ഒരുപാടുപേരുണ്ട്​​. നല്ല സഹകരണമാണ്​ ഇവരുടെ ഭാഗത്തുനിന്ന്​ എന്നും ലഭിച്ചിരുന്നത്​. അവർ നൽകിയ പരിഗണനയാണ്​ തന്നെ വളർത്തിയത്​. പരിശീലനത്തിനെത്തുന്ന കുട്ടികളും കഠിന പ്രയത്​നമുള്ളവരായിരുന്നു. ഇടുക്കിയുടെ കാലാവസ്ഥയും ഭൂപ്രകൃതിയും കായികതാരങ്ങളെ വാർത്തെടുക്കാൻ കഴിയുന്ന തരത്തിലുള്ളതാണ്​. സ്​റ്റേഡിയങ്ങളുടെയും അടിസ്ഥാന സൗകര്യങ്ങളുടെയും അഭാവം വെല്ലുവിളി സൃഷ്​ടിക്കുന്നുണ്ട്​. നല്ല പരിശീലനം നൽകിയാൽ മികച്ച താരങ്ങളായി ഇടുക്കിയിൽനിന്ന്​ ഇനിയും ഒരുപാടുപേരെ വാർത്തെടുക്കാൻ കഴിയുമെന്ന കാര്യം തീർച്ചയാണ്​. TDL KPTHOMAS MASH കെ.പി. തോമസ്​ ( ​ദ്രോണാചാര്യ പുരസ്കാരം, ദേശീയ കായിക അധ്യാപക അവാർഡ്​, കായിക മേഖലയിലെ മികച്ച സംഭാവനകള്‍ക്കുള്ള പുരസ്കാരം​, റിയൽ ഹീറോ അവാർഡ്​ തുടങ്ങിയ പുരസകാരങ്ങൾ നേടി) ​