ഫയർലൈനുകളില്ല; വനഭൂമി കാട്ടു തീ ഭീഷണിയിൽ

p4 lead പീരുമേട്‌: വേനൽ കനത്തിട്ടും സംരക്ഷണമായി പലയിടങ്ങളിലും ഫയർലൈനുകൾ നിർമിക്കാത്തതിനെ തുടർന്ന്​ ഹെക്ടർ കണക്കിന് വനഭൂമി കാട്ടു തീ ഭീഷണിയിൽ. എരുമേലി റേഞ്ചിൽ ഉൾപ്പെട്ടതും പെരിയാർ കടുവാസങ്കേതത്തിലെ മുറിഞ്ഞ പുഴ വനത്തിനും വനം വകുപ്പിന്‍റെ റിസർച് വിഭാഗത്തിലെ പൈൻ തോട്ടങ്ങൾക്കുമാണ് ഫയർ ലൈൻ നിർമിക്കാൻ വൈകുന്നത്. മുറിഞ്ഞപുഴ ഫോറസ്റ്റ്​ സ്​റ്റേഷൻ മുതൽ വളഞ്ചാങ്കാനം വരെ റോഡിന്‍റെ ഇരുവശങ്ങളും പെരിയാർ കടുവ സങ്കേതത്തിലെ വനഭൂമിയും, വളഞ്ചാങ്കാനം, തട്ടാത്തിക്കാനം, പീരുമേട് തോട്ടാപ്പുര എന്നിവിടങ്ങളിൽ റിസർച്ച് വിഭാഗത്തിന്‍റെ പൈൻ തോട്ടങ്ങളും, കുട്ടിക്കാനം പീലിക്കുന്ന് മലയും സാമൂഹ്യ വനവത്​കരണത്തിന്‍റെ ഭാഗമായി 50 ഏക്കറോളം പുൽമേട് വനമായി മാറ്റിയിരുന്നു. ഇവിടെയൊന്നും ഫയർലൈൻ നിർമിച്ചിട്ടില്ല. മുൻ വർഷങ്ങളിലൊക്കെ പീരുമേട്​ വനമേഖലകളിൽ ഹെക്ടർ കണക്കിന്​ വനഭൂമിയാണ്​ കത്തിനശിച്ചത്​. മഴ അവസാനിച്ചതിനുശേഷം വേനൽ കനക്കുന്നതിന് മുമ്പ്​ ഫയർ ലൈൻ നിർമിച്ച് വനം സംരക്ഷിക്കുകയായിരുന്നു മുൻ കാലങ്ങളിലെ പതിവ്. മൂന്ന് മീറ്ററോളം വീതിയിൽ ഫയർ ലൈൻ നിർമിക്കുമ്പോൾ പുറത്തുനിന്ന് വനത്തിനുള്ളിലേക്ക് തീ കയറുന്നത് തടയാൻ സാധിക്കുമായിരുന്നു. അതേസമയം ജില്ലയുടെ വിവിധ ഭാഗങ്ങളിൽ വനം പുൽമേടുകൾ എന്നിവയുടെ സംരക്ഷണവുമായി ബന്ധപ്പെട്ട്​ ഫയർബ്രേക്കറുകൾ സ്ഥാപിച്ചു വരികയാണെന്ന്​ വനം വകുപ്പ്​ അധികൃതർ പറഞ്ഞു. ജനവാസ മേഖലയോട്​ ചേർന്ന സ്ഥലങ്ങൾ, വന മേഖലകൾ എന്നിവിടങ്ങളിലെല്ലാം കാട്ടുതീ നിയന്ത്രണ നടപടികൾ സ്വീകരിച്ചതായും അധികൃതർ അറിയിച്ചു.