പഠനത്തോടൊപ്പം ചങ്ങാത്തം കൂടാം വായനയോടും

p2 lead *പ്രൈമറി ക്ലാസുകളിലെ കുട്ടികൾക്കായാണ്​ പദ്ധതി ആദ്യഘട്ടത്തിൽ നടപ്പാക്കുക തൊടുപുഴ: കോവിഡ്​ കാലം കഴിഞ്ഞുള്ള കുട്ടികളുടെ പഠനം എളുപ്പമാക്കാൻ പദ്ധതികളുമായി പൊതുവിദ്യാഭ്യാസ വകുപ്പും സമഗ്രശിക്ഷ കേരളയും. ഓൺലൈൻ ഓഫ്​ലൈൻ ക്ലാസുകൾ തുടരുന്ന സാഹചര്യത്തിൽ ഒന്നാംക്ലാസ്​ മുതൽ നാലാംക്ലാസ്​ വരെയുള്ള കുട്ടികളുടെ പഠനവും വായനയുമടക്കം ശക്തിപ്പെടുത്തുക എന്ന ലക്ഷ്യത്തിലാണ്​ നിലവിലുള്ള പദ്ധതികൾ പരിഷ്കരിച്ച്​ പുതുരീതികൾ അവലംബിക്കുന്നത്​. കുട്ടികളുടെ എഴുത്ത്​, വായന എന്നിവയിൽ താൽപര്യം ജനിപ്പിച്ചുള്ള പഠനരീതിയാണ്​ ക്രമീകരിച്ചിരിക്കുന്നത്​​. കോവിഡ്​കാല പഠനത്തെ തുടർന്ന്​​ കുട്ടികളിൽ മൊബൈൽ ഉപയോഗം വർധിച്ചുവെന്ന മാതാപിതാക്കളുടെ ആശങ്കക്ക്​ പരിഹാരം കാണുക എന്നതും ഇതിന്‍റെ ഉദ്ദേശ ലക്ഷ്യങ്ങളിലൊന്നാണ്​​. കോവിഡിന്​ മുമ്പ്​ സ്കൂളുകളിൽ ചില പദ്ധതികൾ തുടങ്ങിയെങ്കിലും പഠന രീതികൾ മാറിയ കാലത്ത്​ പദ്ധതികളും പുതുമയോടെ അവതിരിപ്പിക്കുകയാണ്​. അവയിലൊന്നാണ്​ വായന ചങ്ങാത്തം. വായനയുടെ ലോകത്ത്​ പ്രൈമറി തലത്തിൽ തന്നെ കുട്ടികൾക്ക്​ താൽപര്യം ജനിപ്പിക്കുക എന്നതാണ്​ ഇതിലൂടെ ചെയ്യുന്നത്​. മലയാളത്തിന്​ പുറമെ തമിഴ്​, കന്നട ഭാഷകളിലെ കുട്ടികൾക്കായും വായന ചങ്ങാത്തം സംഘടിപ്പിക്കുന്നുണ്ട്​. ഇതിന്‍റെ ഭാഗമായി കുട്ടികൾക്ക്​ റീഡിങ്​ കാർഡ്​ നൽകും. ഇതിൽ കുട്ടികളെ ആകർഷിക്കുന്ന കഥകളും കവിതകളുമടക്കം ഉണ്ടാകും. രക്ഷിതാക്കളുടെ വാട്​സ്​ആപ്​ ഗ്രൂപ്​ വഴി അധ്യാപകർ ഇത്​ അയച്ചും നൽകും. ഇവരും വീട്ടിലെത്തുന്ന കുട്ടികൾക്ക്​ ആകർഷകമായ രീതിയിൽ പറഞ്ഞുനൽകണം. റീഡിങ് കാർഡിൽ കഥയിലെയടക്കം അവരുടെ ഇഷ്ടകഥാപാത്രങ്ങളെ വരക്കാനുള്ള പേജും ഉണ്ടാകും. ഒപ്പം കുട്ടികൾക്ക്​ സ്വന്തമായി അവരുടെ രചനകൾ എഴുതാനും ഇവ സ്കൂൾതലത്തിൽ പ്രകാശനം ചെയ്യാനും സൗകര്യമൊരുക്കും. പദ്ധതി നടത്തിപ്പിനുള്ള പരിശീലന പരിപാടികൾ നടന്നുവരുകയാണ്​. കൂടാതെ ഉല്ലാസ ഗണിതം വീട്ടിലും വിദ്യാലയത്തിലും എന്ന പദ്ധതിയും നടത്തിവരുന്നുണ്ട്. സ്കൂൾ തുറന്നെങ്കിലും 18 മാസത്തോളം വീടുകളിൽ വിദ്യാഭ്യാസം നടത്തിയിരുന്ന കുട്ടികളുടെ പഠന അഭിരുചികളിലടക്കം മാറ്റംവന്നിട്ടുണ്ട്​. കൃത്യമായ വായനയും പഠനവും നടക്കാത്ത സാഹചര്യത്തിലും മൊ​ബൈൽ അടക്കമുള്ളവയുടെ ഉപയോഗം കുട്ടികളിൽ വർധിക്കുകയും ചെയ്ത സാഹചര്യത്തിലാണ്​ ഇത്തരം നടപടികളുമായി പൊതുവിദ്യാഭ്യാസ വകുപ്പ്​ രംഗത്തു​വന്നതെന്ന്​ സമഗ്രശിക്ഷ കേരള സ്​റ്റേറ്റ്​ പ്രോഗ്രാം ഓഫിസർ സുരേഷ്​ കുമാർ പറഞ്ഞു. വിദ്യാർഥികൾക്കുണ്ടാകുന്ന ആശങ്കയടക്കം പരിഹരിക്കുന്നതിന്​ അതിജീവനം എന്ന പദ്ധതി നടത്തുന്നുണ്ട്​. ഇതുകൂടാതെ ആദിവാസി ഊരുകളിലും തീരദേശങ്ങളിലുമുള്ള കുട്ടികൾക്കും രക്ഷിതാക്കൾക്കും പ്രാദേശിക പ്രതിഭ കേന്ദ്രങ്ങൾ വഴി ക്ലാസുകളും നൽകിവരുന്നുണ്ടെന്ന്​ ഇദ്ദേഹം പറഞ്ഞു.