വേനൽ കനക്കുന്നു; ചീയപ്പാറ, വാളറ വെള്ളച്ചാട്ടങ്ങൾ വറ്റി

അടിമാലി: വേനല്‍ കനത്തതോടെ ചീയപ്പാറ, വാളറ വെള്ളച്ചാട്ടങ്ങളുടെ സൗന്ദര്യം ഇക്കുറി നേരത്തേ അസ്തമിച്ചു. സാധാരണ ഫെബ്രുവരി അവസാനത്തോടെയാണ് ഈ വെള്ളച്ചാട്ടങ്ങളില്‍ നീരൊഴുക്ക് നിലക്കുന്നതെങ്കില്‍ ഇക്കുറി പുതുവത്സരത്തിന്​ അഴ്ചകൾക്ക്​ മുമ്പു​തന്നെ നിലക്കുകയായിരുന്നു. ഇക്കുറി കാലവര്‍ഷം കുറയുകയും വേനലിന്‍റെ കാഠിന്യം നേരത്തേ ആവുകയും ചെയ്​തതാണ്​ ഹൈറേഞ്ചിലെ വെള്ളച്ചാട്ടങ്ങള്‍ക്ക് തിരിച്ചടിയായത്. ഇതോടെ വെള്ളച്ചാട്ടങ്ങള്‍ കാണാനെത്തുന്ന സഞ്ചാരികളടക്കമുള്ളവര്‍ നിരാശയിലാണ്. മൂന്നാറില്‍ സഞ്ചാരികള്‍ക്ക് വിസ്മയക്കാഴ്ചയൊരുക്കുന്ന വെള്ളച്ചാട്ടങ്ങളായിരുന്നു ഇവ. കൊച്ചി-മധുര ദേശീയപാതയില്‍ നേര്യമംഗലം വനമേഖലയിലെ ഈ വെള്ളച്ചാട്ടങ്ങള്‍ മൂന്നാറിലേക്കുള്ള സഞ്ചാരികളുടെ ഇടത്താവളമാണ്. ഇവിടെ കാഴ്ചകൾ കാണാൻ ആളുകളേറെ ഇറങ്ങുന്നുണ്ടെങ്കിലും വെള്ളച്ചാട്ടങ്ങള്‍ക്ക്​ സമീപം ഗാലറികള്‍ നിര്‍മിച്ച്​ മോടിപിടിപ്പിക്കുന്നതിനും അടിസ്ഥാന സൗകര്യങ്ങളുടെ വികസനത്തിനും വിനോദസഞ്ചാര വകുപ്പ് ഇതുവരെ നടപടികളൊന്നും സ്വീകരിച്ചിട്ടില്ല. വിദേശികള്‍ ഉള്‍പ്പെടെ സാഹസികര്‍ പാറക്കെട്ടുകളിലൂടെ ഇറങ്ങി വെള്ളച്ചാട്ടത്തിനടുത്തേക്ക് പോകുന്നത് പലപ്പോഴും അപകടങ്ങള്‍ക്ക്​ കാരണമാകുന്നുണ്ട്.