റോഡ്​ നിർമാണം: വനം വകുപ്പി‍െൻറ തടസ്സങ്ങൾ നീക്കും

റോഡ്​ നിർമാണം: വനം വകുപ്പി‍ൻെറ തടസ്സങ്ങൾ നീക്കും തൊടുപുഴ: ജില്ലയിൽ റോഡ്​ നിർമാണത്തിന്​ വനം വകുപ്പി‍ൻെറ അനുമതി ലഭിക്കേണ്ട മേഖലകളിൽ ഇതുമായി ബന്ധപ്പെട്ട തടസ്സം നീക്കാൻ അടിയന്തര നടപടി സ്വീകരിക്കാൻ തീരുമാനം. ഏപ്രിലോടെ പ്രവൃത്തി പൂര്‍ത്തിയാക്കാനാകുന്ന തരത്തില്‍ ഇതിന്​ ക്രമീകരണം നടത്തും. പൊതുമരാമത്ത് മന്ത്രി പി.എ. മുഹമ്മദ് റിയാസി‍ൻെറ അധ്യക്ഷതയില്‍ ചേര്‍ന്ന ഉന്നത ഉദ്യോഗസ്ഥരുടെ യോഗത്തിലാണ് തീരുമാനം ദേശീയപാത 85ല്‍ മൂന്നാര്‍-ബോഡിമെട്ട് റോഡില്‍ വനം വകുപ്പി‍ൻെറ അനുമതി ആവശ്യമില്ലാത്ത മുഴുവന്‍ സ്ഥലങ്ങളിലെയും പ്രവൃത്തി ഫെബ്രുവരിയില്‍ പൂര്‍ത്തീകരിക്കും. അനുമതിയുമായി ബന്ധപ്പെട്ട വിഷയം പരിഹരിക്കാന്‍ കലക്ടറെ ചുമതലപ്പെടുത്തി. ഒരാഴ്ചക്കുള്ളില്‍ കലക്ടര്‍ ഇതിന്​ പ്രത്യേക യോഗം വിളിക്കും.41.78 കി.മീറ്ററില്‍ 3.32 കി.മീറ്ററിലാണ് വനംവകുപ്പി‍ൻെറ അനുമതി വേണ്ടത്​. ബാക്കി 38.46 കി.മീ. റോഡി‍ൻെറയും പ്രവൃത്തി പുരോഗതി യോഗം വിലയിരുത്തി. ബാക്കി എല്ലാ പ്രവൃത്തിയും അടിയന്തരമായി പൂര്‍ത്തിയാക്കാന്‍ മന്ത്രി കരാറുകാര്‍ക്കും ഉദ്യോഗസ്ഥര്‍ക്കും നിർദേശം നല്‍കി. ഇനി പദ്ധതിയില്‍ ഒരുതരത്തി​ലെ കാലതാമസവും അനുവദിക്കില്ലെന്ന്​ മന്ത്രി പറഞ്ഞു. വനം വകുപ്പിനുള്ള ഫണ്ട് പൂർണതോതില്‍ കൈമാറാൻ കേന്ദ്ര ഉപരിതല ഗതാഗത മന്ത്രാലയത്തെ സമീപിക്കും. പൊതുമരാമത്ത് സെക്രട്ടറി ആനന്ദ് സിങ്​, കലക്ടര്‍ ഷീബ ജോർജ്​, ദേശീയപാത വിഭാഗം ചീഫ് എൻജിനീയര്‍ അശോക് കുമാര്‍, മൂന്നാര്‍ ഡി.എഫ്.ഒ, ഉദ്യോഗസ്ഥര്‍, കരാറുകാര്‍ തുടങ്ങിയവര്‍ യോഗത്തില്‍ പങ്കെടുത്തു.