ക്രോസ്​ മാച്ചിങ്​ പരിശോധന സംവിധാനമില്ലാതെ അടിമാലി താലൂക്ക്​ ആശുപത്രി

അടിമാലി: അടിമാലി താലൂക്ക്​ ആശുപത്രിയില്‍ രക്തം ക്രോസ് മാച്ചിങ്​ പരിശോധന നടത്താൻ സൗകര്യമില്ലാത്തത്​ രോഗികൾക്ക്​ തിരിച്ചടിയാകുന്നു. പരിശോധനക്ക്​ വലിയ തുകനൽകി സ്വകാര്യ ആശുപത്രികളെ ആശ്രയിക്കേണ്ട അവസ്ഥയാണ്​. ജില്ലയിലെ സര്‍ക്കാര്‍ ആശുപത്രികളില്‍ ഏറ്റവും കൂടുതല്‍ പ്രസവകേസുകളും ഇതര ശസ്ത്രക്രിയകളും നടക്കുന്ന ആശുപത്രികൂടിയാണ്​ അടിമാലി താലൂക്ക്​ ആശുപത്രി. രക്തം ആവശ്യമായ രോഗിക്ക്​ നൽകുന്നത്​ അനുയോജ്യമായ രക്തം തന്നെയാണോ എന്നറിയാൻ നടത്തുന്ന പരിശോധനയാണ്​ ക്രോസ്​ മാച്ചിങ്​. ചേരാത്ത രക്തം നൽകുന്നത്​ ആരോഗ്യപ്രശ്നങ്ങൾക്ക്​ കാരണമാകും. രോഗിയുടെയും ദാതാവിന്‍റെയും രക്തം കൂട്ടിക്കലർത്തിയാണ്​ പരിശോധിക്കുക. ശസ്ത്രക്രിയ ആവശ്യമായ എല്ലാവരുടെയും രക്തം ക്രോസ്​ മാച്ചിങ്​ നടത്താറുണ്ട്​. എന്നാല്‍, ഇതിനുള്ള സൗകര്യം അടിമാലി താലൂക്ക്​ ആശുപത്രിയിലില്ല. നിലവിൽ ഭീമമായ തുക നല്‍കി സ്വകാര്യ ആശുപത്രികളിലാണ്​ ഈ പരിശോധന നടത്തുന്നത്​. ദേവികുളം താലൂക്കിലെ ആദിവാസി, തോട്ടം മേഖലകളില്‍നിന്നുള്ളവർ കൂടുതലായും പ്രസവ സംബന്ധമായ ആവശ്യത്തിന് ആശ്രയിക്കുന്നത് അടിമാലി താലൂക്ക്​ ആശുപത്രിയെയാണ്. നേര്യമംഗലത്തിനും മൂന്നാറിനും ഇടയില്‍ ഉണ്ടാകുന്ന അപകടങ്ങളില്‍ ആദ്യം ചികിത്സ തേടുന്നതും ഇവിടെതന്നെ. രക്തം നല്‍കുകയും സ്വീകരിക്കുകയും ചെയ്യേണ്ട ഘട്ടങ്ങളില്‍ ആശുപത്രിയില്‍ ക്രോസ് മാച്ചിങ്ങിന്​ സംവിധാനമില്ലാത്തത് പലപ്പോഴും വെല്ലുവിളി ഉയര്‍ത്തുന്നു. അതുപോലെ ഫയര്‍ എന്‍.ഒ.സി ലഭിക്കാത്തതിനാല്‍ ആശുപത്രിയിൽ ഡയാലിസ് യൂനിറ്റും രക്തബാങ്കും പ്രവര്‍ത്തനം തുടങ്ങാനായിട്ടില്ല. idl adi 1 t h q ചിത്രം: അടിമാലി താലൂക്ക്​ ആശുപത്രി