ഭൂമി കൈയേറി അനധികൃത കെട്ടിട നിർമാണം

കട്ടപ്പന: അഞ്ചുരുളി എക്കോ ടൂറിസം കേന്ദ്രത്തിൽ ഭൂമി കൈയേറി സ്വകാര്യ വ്യക്തിയുടെ അനധികൃത കെട്ടിട നിർമാണം. പൊളിക്കാൻ പഞ്ചായത്ത് നോട്ടീസ്​ നൽകിയെങ്കിലും രാത്രിയിലടക്കം നിർമാണം തുടരുകയാണെന്നാണ്​ ആക്ഷേപം. കാഞ്ചിയാർ ഗ്രാമപഞ്ചായത്തിലെ അഞ്ചുരുളി വിനോദസഞ്ചാര കേന്ദ്രത്തിലെ പാർക്കിങ്​ ഗ്രൗണ്ടിനോട് ചേർന്നാണ് ഭൂമി കൈയേറി അനധികൃതമായി നാല്​ ഷട്ടറുകൾ വരുന്ന കടമുറി സ്ഥാപിച്ചിരിക്കുന്നത്. ഇതര സംസ്ഥാന തൊഴിലാളികളെ താമസിപ്പിക്കാനാണ് നിർമിച്ചതെന്നാണ്​ പരിസരവാസികളെ പറഞ്ഞ് വിശ്വസിപ്പിച്ചത്. പിന്നീട് അനുമതി വാങ്ങാതെ നടത്തുന്ന നിർമാണ പ്രവർത്തനങ്ങൾക്ക് പഞ്ചായത്ത് സെക്രട്ടറി സ്​റ്റോപ്​ മെമ്മോയും നൽകി. നിർമാണം നിർത്താൻ ആവശ്യപ്പെട്ട് ആറുതവണയോളമാണ് നോട്ടീസ് നൽകിയത്. ഇതിനിടെ രോഗബാധയെ തുടർന്ന് ഇയാൾ മരിച്ചു. പിന്നീട് മകനാണ് തുടർനിർമാണം നടത്തുന്നതെന്ന് പഞ്ചായത്ത്​ കണ്ടെത്തി. നിർമാണം ഏഴുദിവസത്തിനകം പൊളിക്കണമെന്ന് ആവശ്യപ്പെട്ട്​ ഡിസംബർ 13ന് സെക്രട്ടറി വീണ്ടും നോട്ടീസ് നൽകിയെങ്കിലും പൊളിക്കുകയോ തുടർ നിർമാണം നിർത്തുകയോ ചെയ്തില്ല. ഫോട്ടോ. അഞ്ചുരുളി എക്കോ ടൂറിസം കേന്ദ്രത്തിൽ ഭൂമി കൈയേറി സ്വകാര്യ വ്യക്തി നിർമിക്കുന്ന കെട്ടിടം