ഡോക്​ടർമാരില്ല; മൃഗപരിപാലനം അവതാളത്തില്‍

ലൈവ് സ്‌റ്റോക്​ ഇന്‍സ്‌പെക്ടര്‍മാരുടെ ഒഴിവുകളും നികത്തിയിട്ടില്ല അടിമാലി: ഡോക്​ടര്‍മാരുടെ കുറവ് മൂലം ജില്ലയിൽ മൃഗപരിപാലനം അവതാളത്തില്‍. ജില്ലയില്‍ നാല് ആശുപത്രികളില്‍ ഡോക്ടര്‍മാരില്ല. ആറിടത്താക​െട്ട ഉള്ളവർ അവധിയിലും. ഇതോടെ, ക്ഷീരകർഷകർ പ്രതിസന്ധിയിലാണ്​. ക്ഷീരകര്‍ഷകര്‍ കൂടുതലുള്ള അടിമാലി, ശാന്തന്‍പാറ, വട്ടവട, പെരുവന്താനം മൃഗാശുപത്രികളിലാണ്​ ഡോക്​ടർമാരില്ലാത്തത്. രാത്രിയില്‍ ആശുപത്രികളില്‍ താൽക്കാലിക അടിസ്ഥാനത്തില്‍ നിയമിച്ചിരുന്ന ഡോക്ടർമാരെ പുനര്‍ നിയമിക്കാത്തതും സ്ഥിതി ഗുരുതരമാക്കുന്നു. പാലുല്‍പാദനത്തില്‍ ജില്ലയില്‍ മുന്നിലുള്ള അടിമാലി പഞ്ചായത്തില്‍ മൂന്നുമാസത്തിലേറെയായി ഡോക്​ടറില്ലാതായിട്ട്​. ശാന്തൻപാറയില്‍ രണ്ടുവര്‍ഷവും വട്ടവടയില്‍ ഒരുവര്‍ഷവുമായിട്ട്​ ഡോക്ടര്‍മാരില്ല. ഇതിന് പുറമെ പെരുവന്താനം മൃഗാശുപത്രിയിലും ഡോക്ടറില്ല. ആറുപേര്‍ ദീര്‍ഘകാല അവധിയില്‍ പ്രവേശിച്ചിരിക്കുകയാണ്​. കഴിഞ്ഞ ഒരുമാസത്തിനിടെ അടിമാലി മൃഗാശുപത്രിപരിധിയില്‍ അഞ്ച്​ ആടുകള്‍ ഉള്‍പ്പെടെ 20ലേറെ വളര്‍ത്തുമൃഗങ്ങള്‍ വിവിധ രോഗങ്ങളാല്‍ ചത്തു. 24 മണിക്കൂറും പ്രവര്‍ത്തിക്കുന്ന ആശുപത്രിയാണ് അടിമാലിയിലേത്. രണ്ട്​ ഡോക്​ടർമാര്‍ വേണ്ട ഇവിടെ ഡോക്ടര്‍ ഇല്ലാതെ വന്നത് ഏറെ പ്രതിസന്ധിയാണ് ഉണ്ടാക്കിയിരിക്കുന്നത്. അധിക ചുമതല നല്‍കിയിരിക്കുന്ന ഡോക്​ടർ വെള്ളിയാഴ്ച മാത്രമാണ് എത്തുന്നത്​. ഫയലുകള്‍ നോക്കുന്നതിനപ്പുറം ഒന്നും നടക്കാറില്ല. ശാന്തന്‍പാറ ഗവ. മൃഗാശുപത്രിയില്‍ രണ്ടുവര്‍ഷത്തോളമായി വെറ്ററിനറി ഡോക്ടറുടെ തസ്തിക ഒഴിഞ്ഞുകിടക്കുകയാണ്. രാജകുമാരി ഗവ. മൃഗാശുപത്രിയിലെ വെറ്ററിനറി ഡോക്ടര്‍ക്കാണു ശാന്തന്‍പാറ പഞ്ചായത്തി​ൻെറ അധികച്ചുമതല. അടിയന്തര സാഹചര്യങ്ങളില്‍ വെറ്ററിനറി ഡോക്ടര്‍ക്ക് ശാന്തന്‍പാറയിലെ വിദൂരപ്രദേശങ്ങളില്‍ എത്തിച്ചേരാന്‍ കഴിയാറില്ലെന്ന്​ കര്‍ഷകര്‍ പറയുന്നു. വട്ടവട പഞ്ചായത്തിലും സ്ഥിതി മോശമാണ്. ലൈവ് സ്‌റ്റോക് ഇന്‍സ്‌പെക്ടര്‍മാരുടെ നിരവധി ഒഴിവുകളും ജില്ലയില്‍ നികത്താതെ കിടക്കുന്നുണ്ട്.