വീട്ടമ്മയുടെ കാലിലെ ഒന്നരക്കിലോ ഭാരമുള്ള മുഴ നീക്കി

തൊടുപുഴ: ചാഴികാട്ട് ആശുപത്രിയിൽ ചികിത്സക്കെത്തിയ 55കാരിയായ വീട്ടമ്മയുടെ കാലിൽനിന്ന്​ മൂന്നുവർഷം പഴക്കമുള്ള മുഴ നീക്കി. 'ജയൻറ്​ ലൈപ്പോമ' വിഭാഗത്തിൽപ്പെട്ട ഒന്നരക്കിലോ ഭാരമുള്ള മുഴ പ്രധാന ഞരമ്പും രക്തക്കുഴലുകളുമായി ഒട്ടിച്ചേർന്ന നിലയിലായിരുന്നു. നാല്​ മണിക്കൂർ നീണ്ട ശസ്​ത്രക്രിയയിലൂടെ ഞരമ്പുകൾക്കും രക്തക്കുഴലുകൾക്കും ക്ഷതം സംഭവിക്കാതെ ആശുപത്രിയിലെ പാസ്​റ്റിക് സർജന്മാരാണ്​ മുഴ പുറത്തെടുത്തത്​. ശസ്​ത്രക്രിയ കഴിഞ്ഞ് ഒരുമാസത്തിന് ശേഷം രോഗിയുടെ കാലിന് ഒരു ബലക്കുറവും ഇല്ലാതെ പഴയതുപോലെ നടക്കാൻ സാധിക്കുമെന്ന്​ ഡോക്​ടർമാർ പറഞ്ഞു. മുഴക്ക്​ 28 സെ.മീ വലിപ്പം ഉണ്ടായിരുന്നു. 10 സെ.മീയിൽ കൂടുതൽ വലിപ്പമുള്ളതിനെയാണ് ജയൻറ് ലൈപ്പോമ എന്ന് വിളിക്കുന്നത്. പ്ലാസ്്റ്റിക് സർജന്മാരായ ഡോ. രഞ്ജി ഐസക് ജയിംസ്​, ഡോ. അനീഷ് ജോസഫ് എന്നിവരാണ് ശസ്​ത്രക്രിയക്ക്​ നേതൃത്വം നൽകിയത്. ............................. തൊടുപുഴ മാസ്​റ്റർപ്ലാൻ മരവിപ്പിക്കണം: പി.ജെ. ജോസഫ് നിവേദനം നൽകി തൊടുപുഴ: തൊടുപുഴ മാസ്​റ്റർപ്ലാൻ നടപ്പാക്കുന്നത് മരവിപ്പിക്കണമെന്ന് ആവശ്യപ്പെട്ട്​ പി.ജെ. ജോസഫ് എം.എൽ.എ തദ്ദേശ സ്വയംഭരണ മന്ത്രി എം.വി. ഗോവിന്ദന് നിവേദനം നൽകി. തൊടുപുഴ നഗരസഭക്കായി തയാറാക്കിയ മാസ്​റ്റർപ്ലാനിൽ അപ്രായോഗികമായ പല പദ്ധതികളും ഉൾപ്പെടുത്തിയിട്ടുണ്ട്. തൊടുപുഴ പട്ടണത്തിലെ റോഡുകൾ വീതി കൂട്ടുന്നതിനുള്ള ബുദ്ധിമുട്ടുകൾ കൂടി പരിഗണിച്ചാണ് ബൈപാസുകൾ നിർമിച്ചത്. എന്നാൽ, പഴയ റോഡുകളും പുതിയ ബൈപാസുകളും 24 മീറ്റർ വീതിയിൽ നിർമിക്കണമെന്നാണ് മാസ്​റ്റർപ്ലാനിലെ നിർദേശം. മുതലക്കോടം ബൈപാസ് പോലെ ഒട്ടും പ്രായോഗികമല്ലാത്ത പാതകളും നിർദേശിക്കപ്പെട്ടിട്ടുണ്ട്. 10വർഷം മുമ്പ് തയാറാക്കിയ മാസ്്റ്റർ പ്ലാനിൽ കാതലായ മാറ്റം വരുത്തേണ്ടത് അനിവാര്യമാണ്. പ്രാഥമിക വിജ്ഞാപനം പുറപ്പെടുവിച്ചതിനാൽ പദ്ധതി പ്രദേശത്തെ ഭൂമി മരവിപ്പിച്ച സാഹചര്യത്തിൽ പൊതുജനങ്ങൾക്ക് വലിയ ക്ലേശങ്ങൾ ഉണ്ടായിട്ടുണ്ട്​. മാസ്​റ്റർ പ്ലാൻ കുറ്റമറ്റ രീതിയിൽ അന്തിമമാക്കാൻ അവസരം ഒരുക്കണമെന്നും പി.ജെ. ജോസഫ്​ നിവേദനത്തിൽ ആവശ്യപ്പെട്ടു. .................... സീറ്റ് ഒഴിവ് ഇടുക്കി: കട്ടപ്പന ഗവ. ഐ.ടി.ഐയില്‍ ടൂറിസ്​റ്റ് ഗൈഡ് ട്രേഡില്‍ ഒഴിവുള്ള ഏതാനും സീറ്റിലേക്ക്​ അപേക്ഷ ക്ഷണിച്ചു. നവംബര്‍ 30ന്​ വൈകീട്ട്​ നാലിന്​ മുമ്പ്​ എസ്.എസ്.എല്‍.സി, പ്ലസ്​ടു, ആധാര്‍, ജാതി സര്‍ട്ടിഫിക്കറ്റ് (എസ്.സി/എസ്.ടി/ഒ.ഇ.സി മാത്രം) എന്നിവയുടെ പകര്‍പ്പുമായി സ്ഥാപനത്തില്‍ നേരിട്ട് ഹാജരായി അപേക്ഷ സമര്‍പ്പിക്കണം. അപേക്ഷ ഫീസ് 100 രൂപ. ഫോൺ: 04868272216.