മോശമായ പെരുമാറ്റം; നാട്ടുകാർ റേഷന്‍കട ഉപരോധിച്ചു

നെടുങ്കണ്ടം: കടയുടമ മോശമായി പെരുമാറുന്നുവെന്ന്​ ചൂണ്ടിക്കാട്ടി നാട്ടുകാർ റേഷൻകട ഉപരോധിച്ചു. തൂക്കുപാലം പ്രകാശ്ഗ്രാമില്‍ പ്രവര്‍ത്തിക്കുന്ന റേഷന്‍കട ഉടമക്കെതിരെയാണ് നാട്ടുകാരുടെ നേതൃത്വത്തില്‍ സ്ത്രീകള്‍ അടങ്ങുന്ന സംഘം ഉപരോധം സംഘടിപ്പിച്ചത്. കടയുടമ പലപ്പോഴും റേഷന്‍ വാങ്ങുവാന്‍ എത്തുന്നവരോട്​ അപമര്യാദയായി പെരുമാറുന്ന സാഹചര്യത്തിലാണ്​ ഉപരോധ സംഘടിപ്പിച്ചതെന്ന്​ സമരം ഉദ്ഘാടനം ചെയ്ത്​ അപ്‌കോസ് പ്രസിഡൻറ്​ നിര്‍മല നന്ദകുമാര്‍ ആരോപിച്ചു. നാട്ടുകാരുടെ നേതൃത്വത്തില്‍ റേഷന്‍കട വളയുകയും പ്രകടനമായെത്തി റേഷന്‍കടക്ക് മുന്നില്‍ ഉപരോധസമരം സംഘടിപ്പിക്കുകയുമായിരുന്നു.