നഴ്‌സുമാരില്ല; അടിമാലി താലൂക്ക്​ ആശുപത്രി പ്രവര്‍ത്തനം താളംതെറ്റുന്നു

‍ അടിമാലി: സൗകര്യം ഏറെയുണ്ടായിട്ടും ജീവനക്കാരുടെ കുറവ് മൂലം കഷ്​ടപ്പെടുന്ന അടിമാലി താലൂക്ക്​്​ ആശുപത്രിയുടെ പ്രവര്‍ത്തനം പ്രതിസന്ധിയില്‍. കോവിഡ് ബ്രിഗേഡിയര്‍, നാഷനല്‍ ഹെല്‍ത്ത് മിഷന്‍ (എന്‍.എച്ച്.എം), ആശുപത്രി വികസന സമിതി എന്നിവിടങ്ങളില്‍നിന്ന് ലഭിച്ച നഴ്‌സുമാര്‍ അടക്കം ജീവനക്കാരില്‍ ഏറിയ പങ്കും പോയതോടെയാണ് പ്രതിസന്ധി രൂക്ഷമായത്. സ്​റ്റാഫ് നഴ്‌സുമാരുടെ കുറവ് സര്‍ക്കാറിനെ ബോധ്യപ്പെടുത്തിയതിനെ തുടര്‍ന്ന് ഒന്നാം പിണറായി സര്‍ക്കാര്‍ മൂന്നുപേരുടെ അധിക തസ്തിക നല്‍കിയിരുന്നു. എന്നാൽ, ഇത്​ ഒട്ടും പര്യാപ്​തമല്ല. 27 ഡോക്ടർമാര്‍ ഉള്ള ഇവിടെ മൂന്ന് ഹെഡ് നഴ്സും 14 സ്​റ്റാഫ് നഴ്സുമാണ് ഉള്ളത്. ഇതില്‍ രണ്ടുപേര്‍ കോവിഡ് ബ്രിഗേഡിയര്‍ ഡ്യൂട്ടിയിലേക്ക് മാറുകയും നഴ്സിങ്​ സൂപ്രണ്ട് തസ്​തിക ഒഴിഞ്ഞ​ുകിടക്കുകയും ആശുപത്രി സൂപ്രണ്ട് നീണ്ട അവധിയില്‍ പ്രവേശിക്കുകയും ചെയ്തതോടെ കോവിഡ് ട്രീറ്റ്മൻെറ്​ സൻെറര്‍ കൂടിയായ ഇവിടെ കാര്യങ്ങള്‍ കുഴഞ്ഞുമറിഞ്ഞിരിക്കുകയാണ്. ആശുപത്രി വികസനം വേഗത്തിലാക്കുമെന്ന് സര്‍ക്കാര്‍ ആവര്‍ത്തിക്കു​േമ്പാഴും രണ്ട് താലൂക്കുകളുടെ പ്രധാന ആശ്രയമായ അടിമാലി താലൂക്ക്​ ആശുപത്രിയില്‍ വേണ്ടത്ര ജീവനക്കാരെ നല്‍കാത്തത്​ ഇവിടെ എത്തുന്ന രോഗികള്‍ക്ക് കൃത്യമായ പരിചരണം ലഭിക്കാത്ത സാഹചര്യം ഉണ്ടാക്കുന്നു. തോട്ടം, കാര്‍ഷിക മേഖലകളിലെ തൊഴിലാളികളും ആദിവാസികളും ഇതുമൂലം പ്രതിസന്ധിയിലാണ്. 66 ബെഡുകളോടെ 1961 ലാണ് സാമൂഹിക ആരോഗ്യ കേന്ദ്രമായി പ്രവര്‍ത്തനം തുടങ്ങിയത്. 2011ല്‍ താലൂക്ക്​ ആശുപത്രിയായി ഉയര്‍ത്തി. താലൂക്ക്​ ആശുപത്രിക്ക് ആവശ്യമായ ജീവനക്കാരെ നിയമിക്കാതെ 1961ലെ കണക്ക് അനുസരിച്ചാണ് ഇപ്പോഴും ജീവനക്കാരുള്ളത്. വിശാലമായ കെട്ടിടങ്ങളും 130 ബെഡുകളുമായി ആശുപത്രി വളര്‍ന്നെങ്കിലും ജീവനക്കാരുടെ എണ്ണം വർധിപ്പിച്ചില്ല. കോവിഡ് ഡ്യൂട്ടിയിലടക്കം 40 സ്​റ്റാഫ്​ നഴ്സ്​മാരെ കൂടി നിയമിച്ചാലെ ആശുപത്രിയുടെ പ്രവര്‍ത്തനം സുമഗമാകൂ എന്നാണ്​ ചൂണ്ടിക്കാണിക്കപ്പെടുന്നത്​. 17 നഴ്സിങ്​ അസിറ്റൻറ്​ വേണ്ടിടത്ത് ആറുപേര്‍ മാത്രമാണ് ഉള്ളത്. ഇതില്‍ ഒരാളുടെ ഒഴിവ് നികത്തിയിട്ടില്ല. 20 ക്ലീനിങ്​ സ്​റ്റാഫ് വേണ്ടിടത്ത് ആറുപേര്‍ മാത്രമാണുള്ളത്. ലാബ്, ഫാര്‍മസി എന്നിവിടങ്ങളിൽ പൂർണമായും താൽക്കാലിക ജീവനക്കാരാണ്. ഒ.പിയില്‍ 1300ന് മുകളില്‍ രോഗികളെത്തുബോള്‍ 130 ബെഡുകളിലായി 150 ലേറെ പേര്‍ ചികിത്സയിലുമുണ്ട്. പ്രതിദിനം രോഗികളുടെ എണ്ണം പെരുകിയിട്ടും ആശുപത്രിയോട് സര്‍ക്കാര്‍ അവഗണന തുടരുകയാണ്​. idl adi 1 hospital ചിത്രം - അടിമാലി താലൂക്ക്​ ആശുപത്രി