പൊലീസ്​ സര്‍ജ​നില്ലാതെ അടിമാലി താലൂക്ക്​ ആശുപത്രി

അടിമാലി: താലൂക്ക്​ ആശുപത്രിയില്‍ പൊലീസ്​ സര്‍ജ​ൻെറ സേവനം ലഭ്യമാക്കണമെന്ന ആവശ്യത്തിന് നാളുകളുടെ പഴക്കമുണ്ട്. സര്‍ജ​ൻെറ അഭാവത്താല്‍ ആശുപത്രിയില്‍ എത്തുന്ന അസ്വാഭാവിക മരണവുമായി ബന്ധപ്പെട്ട പോസ്​റ്റ്​മോർട്ടം നടപടിക്ക്​​ കോട്ടയത്തോ ഇടുക്കിയിലോ എത്തിക്കേണ്ട സാഹചര്യമാണ​ുള്ളത്. ഇതുമൂലം ഉണ്ടാകുന്ന അധിക സാമ്പത്തിക ചെലവിന് പുറമെ മൃതദേഹം വിട്ടുകിട്ടാൻ വേണ്ടിവരുന്ന കാലതാമസവും ബന്ധുക്കള്‍ക്ക് ഏറെ ബുദ്ധിമുട്ട് സൃഷ്​ടിക്കുന്നു. മറയൂര്‍, വട്ടവട, ഇടമലക്കുടി തുടങ്ങിയ അതിര്‍ത്തി മേഖലകളില്‍നിന്നടക്കം ആളുകള്‍ അടിമാലി താലൂക്ക്​ ആശുപത്രിയെയാണ്​ ആശ്രയിക്കുന്നത്. അസ്വാഭാവിക മരണം നടക്കുന്ന സന്ദര്‍ഭങ്ങളില്‍ ഇന്‍ക്വസ്​റ്റ്​ നടപടി പൂര്‍ത്തീകരിച്ച ശേഷമാകും പലപ്പോഴും പോസ്​റ്റ്​മോർട്ടത്തിനായി ഇടുക്കിയിലേക്കോ കോട്ടയത്തേക്കോ കൊണ്ടുപോകണമെന്ന നിർദേശം ബന്ധുക്കള്‍ക്ക് ലഭിക്കുക. മൃതദേഹം വിട്ടുകിട്ടുവാന്‍ ബന്ധുക്കള്‍ പിന്നെയും കാത്തിരിക്കണം. ആംബുലന്‍സ് കൂലിക്കടക്കം അധിക സാമ്പത്തിക ബാധ്യതയും ഇത്​ വരുത്തും. താലൂക്ക്​ ആശുപത്രിയില്‍ പൊലീസ്​ സര്‍ജ​ൻെറ സേവനം ലഭ്യമാക്കിയാല്‍ ഈ പ്രശ്‌നങ്ങള്‍ക്കൊക്കെയും പരിഹാരമാകുമെന്നാണ് ചൂണ്ടിക്കാട്ടുന്നത്​.